Governadór BCTL, Abraão de Vasconcelos. Imajen TATOLI/António Gonçalves

AINARO, 29 novembru 2020 (TATOLI)Banku Sentrál Timor-Leste (BCTL, sigla portugés) daudaun ne’e envole empreza Telemor Fintech hodi fornese servisu finanseiru dijitál iha Timor-Leste.

Governadór BCTL, Abrãao Vasconselhos, hateten razaun envole instituisaun sira tanba atu implementa programa ne’ebé mak iha relasaun ho modernizasaun sistema pagamentu iha Timor-Leste.

Aleinde ne’e, banku komersiál haat hanesan Banku Nasionál Komérsiu Timor-Leste (BNCTL, sigla portugés), Banco Nacional Ultramarino (BNU), Bank Rakyat Indonesia (BR)I, no Mandiri envolve iha ínisiu tinan 2015 hodi realiza inisiativa lubuk ida atu moderniza sistema pagamentu nasionál.

“Iha tinan 2018, BCTL estende tan promove empreza Financial Tecnology (Fintech), ne’ebé empreza ne’e sira  fornese servisu foun finanseira dijitál. Entaun iha 2018, Banku Sentrál autoriza empreza Telemor Fintech atu halo teste ba sira-nia produtu hanaran Mosan no iha 2019 BCTL hasai autorizasaun finál ba produtu Mosan ne’ebé mak empreza Telemor Fintech ne’e subsidiária hosi empreza Telemor Telekomunikasaun,” Governadór BCTL hateten iha Pouzada Maubisse, munisípiu Ainaro, domingu ne’e.

Governadór ne’e esplika, iha tinan 2019 BCTL autoriza operadór telekomunikasaun indonéziu, Telkomcel ninia subsidiária hanaran Telin Digital solution, Lda, atu teste plataforma T.Pay, ne’ebé hanesan Mosan maibé maneira opera oin seluk.

“Dadaun ne’e iha Timór, operadór telekomunikasaun ne’ebé iha empreza subsidiáriu, iha rua hanesan Telemor iha ninia subsidiáriu hanaran Telemor Fintech no Telekomcel iha empreza subsidiáriu hanaran Telin Digital solution,” nia akresenta.

BCTL konvida instituisaun finanseira hotu ne’ebé mak iha produtu dijitál hamutuk atu tama iha pakote ida ne’ebé lansa daudaun mak programa Kampo Dijitál hodi promove pagamentu modernu.

Iha parte seluk, Governadór BCTL ne’e mós dehan, empreza Telemor Fintech ne’ebé mak BCTL envolve iha fornesementu sistema finanseira dijitál ne’e laiha ligasaun ho empreza Telemor Telekomunikasaun, ne’ebé dadaun ne’e problema ho Estadu Timor-Leste relasiona ho dada internet ilegál.

“Empreza Telemor telekomunikasaun ho Telemor Fintech ne’e diferente, entidade ida ne’ebé BCTL superviziona maka BCTL fó lisensa mak Telemor Fintech ne’e. Ami akompaña notísia sira ne’e ho atensaun impaktu saida mak atu mai Telemor Fintech, maibé id- ne’e autoridade seluk nia área ne’ebé sira tenke preokupa, Telemor Fintech laiha buat ida, ho telemor telekomunikasaun kuandu deside taka entaun banku sentrál haree saida mak atu akontese ho telemor Fintech más ida ne’e”, Abrãao esklarese.

BCTL autorizada plataforma mosan, ne’ebé aban bainrua sira hakarak uza tan plataforma seluk tenke iha autorizasaun ketak ida hosi BCTL. Plataforma ‘MOSAN’ ne’e mak iha fasilidade halo transferénsia, sosa sasan, ne’e fasilidade la’ós produtu katak fasilidade iha plataforma nia laran.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here