Ekipa DIT FC selebra vitória hafoin manan AS Ponta Leste liuhosi "drama" suta penalidade. Imajen/Liga Timorense

DILI, 28 novembru 2020 (TATOLI) – Jogu Tasa 12 Novembru, epoka ne’e, hakur daudaun ona ba kuatru finál. Ekipa futeból hotu-hotu ne’ebé tama iha jogu oitavu finál tenke halo esforsu atu manan. Lakon ne’e “mehi aat” ida tanba tenke sai ona hosi jogu ne’e.

Notísia Relevante : Boavista manan 3-0 ba Emanuel, Lalenok hein iha kuatru finál

Iha kontinuasaun jogu oitavu finál Tasa 12 Novembru, ohin lokraik, iha Estádiu Munisipál Dili, entre ekipa DIT FC  ho AS Ponta Leste tenke hakotu liuhosi “drama” suta penalidade.

Jogadór-sira AS Ponta Leste nian lori bola no hetan atake hosi jogadór na’in-rua hosi DIT FC. Imajen/Liga Timorense

Iha jogu primeira parte nian, ekipa rua joga ho ritmu ne’ebé kontra atake ho esperansa katak esforsu entre jogadór-sira ekipa rua nian bele prodús golu ba guarda rede. Maibé to’o jogu primeira parte nia rohan, laiha jogadór ida hosi ekipa rua mak prodús golu (0-0).

Hakat ba jogu segunda parte nian,  iha minutu 75, jogadór avansadu DIT FC, José Santos (7) lansa golu ida ba guarda rede AS Ponta Leste hodi muda score 1-0.

Ho golu ne’e fó esperansa ba DIT FC katak sira mak manan duni ona jogu ida ne’e, maibé teki-teki de’it, iha minutu  90+1 avansadu AS Ponta Leste, Silvero Garcia (27) lansa suta ida hodi kontribui kedas score ba AS Ponta Leste  hamriik hanesan ho DIT FC 1-1.

Hosi rezultadu ne’e obrigadu tenke lori jogu ekipa rua nian hakat ba “drama” suta penalidade. Maibé Dewi Fortuna nia espíritu hamahan ba FC DIT, nune’e  jogadór AS Ponta Leste nian na’in-rua la konsege marka golu. Entretantu, jogador na’in-lima  hosi DIT FC nian ne’ebé eskola suta penalidade hatama hotu kedas golu ba guarda rede AS Ponta Leste nian.

Golu “drama” penalidade DIT FC nian kontribui hosi Jovanio Braz (8), Ruben Borges (27), Gabriel da Costa (95), Venceslau Fatima (22) no Ervino Soares (27).

Ponta Leste nian hatama hosi Silveiro Garcia (27), Anizio Correia (9) no João Halle (17). Ho nune’e, AS Ponta Leste hela ho golu haat (4) no DIT FC akumula golu neen (6) hodi manan jogu ne’e no merese hakat ba kuatru finál.

AS Ponta Leste tenke simu nia derrota no obrigadu despede ona jogu  tasa 12 Novembru, epoka ne’e, hodi hein fali jogu iha oportunidade seluk no iha tinan oin 2021.

Jornalista   : Hortencio Sanchez

Editór           : Francisco Simões

 

HAKEREK NO HATÁN

Please enter your comment!
Please enter your name here