Saudozu Mau-Karo 305. Imajen/Espesial.

LIQUIÇÁ, 28 novembru 2020 (TATOLI)–Família hosi saudozu Mau-Karo 305, Vicente da Conceição dos Santos “Railos”, orgullu ba Estadu ne’ebé iha ámbitu Komemorasaun Proklamasaun Indepénsia ba dala-45 ne’e rekoñese saudozu ho medalla Orden Timor-Leste títulu postumu.

Mau-Karo, moris iha loron 27 maiu 1956, iha Suku Metagou, Assorlema, Postu Administrativu Bazartete, Munisípiu Liquiçá. Mau-Karo nu’udar família agikultór hosi fuan domin Felix da Conceição no Aurora de Araújo.

Mau-Karo “305” nu’udar oan mane dahuluk ho nia alin na’in-sia mak hanesan: Francisco da Conceição (matebian), Martina da Conceição, José da Conceição, Vicente da Cruz da Conceiçao dos Santos ‘Railos’, Alberto da Conceição Mau-Karo-II (matebian), Domingos da Conceição dos Santos, João da Conceição (matebian), Domingas da Conceição (matebian), Felisberta da Conceição.

Mau-Karo nu’udar agrikultór ho kategoria ki’ik kamponeze proletariadu no la hetan edukasaun formál no informál iha banku eskola nian, maibé nia ema ida ne’ebé intelijente no gosta atu aprende ho ema seluk.

 “Sente orgullu tanba estadu bele rekoñese nia hanesan erói ida, triste ba família tanba lakon ami-nia ema ida. Hanesan alin hosi saudozu Mau-Karo 305, husu ba Estadu la’ós atribui de’it mak diploma maibé haree mós nesesidade sira seluk hodi atribui ba família saudozu nian, liuliu refleta kona-ba ekonomia moris kada loron nian. Ida-ne’e importante,” Railos informa ba Agência TATOLI, iha Suku Lauhata, Postu Administrativu Bazartete, Munisípiu Liquiçá, sábadu ne’e.

Nune’e mós, veteranu Gregório dos Santos ‘Blehitu’ agradese Xefe Estadu ne’ebé kondekora saudozu Mau-Karo 305 tanba rekoñese erói sira-nia kontribuisaun iha funu naruk ida-ne’e.

“Saudozu Mau-Karo 305 merese hetan medalla Orden Timor-Leste,” veteranu hosi Munisípiu Liquiçá ne’e hateten.

Aleinde ne’e, Xefe Estadu Maiór Jenerál F-FDTL, Brigadeiru Jenerál Falur Rate Laek, subliña uluk forsa Indonézia sira rona de’it naran Mau-Karo 305 ne’e nakdedar hotu.

“Mau-Karo 305 ne’e erói ida famozu. Uluk kuandu temi de’it nia naran Indonézia nakdedar hotu. Ne’e Estadu tenke rekoñese, la’ós nia de’it maibé kondekora mós sira seluk,” Falur Rate Laek dehan.

Liuhosi Dekretu Prezidente Repúblika númeru 69/2020, 26 novembru, Xefe Estadu rekoñese no valoriza sidadaun nasionál ne’ebé sakrifika sira-nia tempu juventude no husik oportunidade atu ba tuir edukasaun formál iha eskola tanba hakarak liberta rai doben Timor-Leste. Estadu no Nasaun tomak fó rekoñesimentu no valorizasaun, liuhosi kondekorasaun Orden Timor-Leste, ba knaar importante hirak ne’ebé mak hatudu tiha ona.

Sidadaun nasionál sira ne’ebé hetan kondekorasaun   “Kolar Orden Timor-Leste” ho títulu postumu mak Frederico Raimundo  da Costa “Bere Malai Laka, Filipe dos Santos “Sakinere”, Pedro Nunes “Sabalae”, Virgílio Freitas “Kalisá” Joaquim Urbano Saldanha “Naha Berek”, Dulce Maria da Cruz “Wewe”, Manuel Soares “Assu Coli”, Amadeu Araújo dos Santos “Mabay Surik”, Miguel da Silva “Sawa”, Pedro Gonçalves Lemos “Teki”.

Prezidente Repúblika fó kondekorasaun “Kolár Orden Timor-Leste” ba Justo Bernardino da Costa “Lari Mau”, Augusto Araújo “Tara Ablai Anan”.

Sidadaun nasionál sira ne’ebé Estadu fó kondekorasaun “Medalla Orden Timor-Leste” ho títulu postumu mak Clotilde Maria de Fátima “Lou Tik”, Sebastião M. Serpa Ximenes “Laloran”, Mau Caro “305”, Bernardino Xavier “Bermoruk”, Moises  Assunção dos Santos “Anak Timur”, Domingos da C. Magalhães  “Tilun Tuk”, Venceslau Martins de Carvalho, Melina Madeira “Bi Oan Kiak, Agostinho da Silva “Caina”.

“Medalla Orden Timor-Leste” kondekora ba  Pascoal Ximenes Pereira “Nixon”, Virgílio da Costa Mendonça “Tuba Rai”,  Sidónio Ximenes “Maunanis”, Mário de Sousa Guterres da Silva “Nunura”, Teófilo de Jesus “La Sudur”,  Deolindo da Costa Amaral “Mota Sarai Ran Nakali”, Hermenegildo Gonçalves “Kaer Susar”,  António Pinto, Tomás Ximenes Gama “Mau Gadi”,  Cesário da Costa “Malcom”,  Luisa Amaral “Bikiak”, Inês Rodrigues, Tomás Guterres “Mau Leça”, Raul Soares “Sakudi”, Alberto da Silva “Sera Malik”, Amélio da Costa Xavier “Fatati”, Adelino Nuha Txai “Mau Nuha”, Manuel Gonçalves “La Haluha”

 Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here