Prezidente Repúblika, Francisco Guterres 'Lú Olo'. Imajen Tatoli/Egas Cristovão

LIQUIÇÁ, 28 novembru 2020 (TATOLI)–Prezidente Repúblika (PR), Francisco Guterres Lú Olo apela ba povu Liquiçá atu servisu badinas hodi dezenvolve rai Liquiçá.

“Ha’u hakarak saúda autoridade Liquiçá hotu-hotu ne’ebé kontribui ba susesu selebrasaun loron istóriku ida-ne’e. Nune’e, Liquiçá oan sira, ha’u apela ba imi hotu atu servisu badinas liután, tau neon hamutuk atu dezenvolve Liquiçá,” Xefe Estadu afirma iha ámbitu komemorasaun loron proklamasaun ba dala 45, iha munisípiu Liquiçá, sábadu ne’e.

Tuir nia, munisípiu Liquiçá  ho ninia beleza naturál no karaterístika rasik, tanba besik liu kapitál Dili, bele dezenvolve lalais liu ho turizmu istóriku no agro-ekolójiku.

Xefe Estadu harutan, rai Liquiçá nia furak oin-oin, kontraste rai malirin no manas, kontraste foho no rai-tetuk no iha mós asesu ba tasi, iha bee-lihun boot ida, lagoa Maubara no mota Loes ne’ebé boot, suli mós iha bailoron no riku tebes.

“Iha Liquiça ita haree edifísiu oin-oin, harii iha tempu koloniál Portugés, ne’ebé ita tenke rekoopera lalais tanba iha interese istóriku”, Lú Olo afirma.

Nia dehan Suku Hatuquesi no aldeia Gariana bele sai sentru istóriku importante ba Timor-Leste tanba Komandante Nino Konis Santana organiza rezisténsia iha fatin rua ne’e durante luta libertasaun nasionál.

“Ita-nia erói nasionál boot, saudozu Nicolau dos Reis Lobato, abut Liquiçá nian. Rai Liquiçá bele dezenvolve nu’udar sentru produsaun hahán husi rai-maran no hosi tasi ba kapitál Dili ho populasaun boot tebes no sei sa’e ba beibeik,” nia dehan.

Lú Olo salienta katak Loes mós besik fronteira no bele sai sentru merkadu boot ida ho interkámbiu ho rai Indonézia no ho Munisípiu Bobonaro no Ermera.

Nia mós dehan esplorasaun rai-henek ba konstrusaun aas tebes iha Liquiçá maibé Estadu presiza haree no regulariza oinsá fahe atividade ida-ne’e ba emprezáriu lokál sira atu família barak liu bele hetan benefísiu mós husi rekursu naturál ne’e.

“Ita bele haree katak rai halai maka’as iha Liquiçá, nune’e, autoridade lokál presiza haree oinsá proteje foho no mota-ninin atu rai labele halai no mota labele sai husi nia dalan naturál no estraga uma no sasán populasaun nian,” xefe estadu hateten.

PR Lú Olo haklaken, Liquiçá oan fó an ba mate ba rai ida-ne’e no balun haloot ona iha Jardin Erói Pátria. Tanba ne’e, presiza haree oinsá hatutan sira-nia ezemplu patriotizmu husi jerasaun ba jerasaun, atu Liquiçá oan bele kaer metin valór no prinsípiu ne’ebé garante moris nafatin nu’udar povu no nasaun.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here