Governadór BCTL, Abrãao de Vasconselhos. Imajen TATOLI/António Gonçalves

AINARO, 28 novembru 2020 (TATOLI)-Governadór Banku Sentrál Timor-Leste (BCTL, sigla portugés), Abrãao Vasconselhos, hateten banku durante ne’e halo Kooperasaun ho Telemor Fintech la’ós ho empreza Telemor telekomunikasaun.

Dirijente ko’alia asuntu ne’e relasiona ho kazu ligasaun internet ilegál ne’ebé envolve mós operadór telekomunikasaun hosi vietnam ne’e.

“Banku Sentrál akompaña ho interese boot tebes ba buat ne’ebé akontese iha loron hirak liubá, maibé ami koopera ho Telemor Fintech hanesan subsidiáriu hosi Telemor, la’ós Telemor ida empreza telekomunikasaun,” Governadór BCTL hateten iha postu administrativu Maubisse, munisípiu Ainaro, sábadu ne’e.

Notísia Relevante: SIC detein jestór prinsipál Telemor ho Elite Computer

Tuir Dirijente banku ne’e, kliente nia osan iha konta e-wallet (mosan) sei la afeta ho saida mak akontese ba operadór telekomunikasaun Telemor.

Banku Sentrál fó autorizasaun ba empreza independente ne’ebé laiha koneksaun ho atividade seluk no fornese servisu ida de’it, maka bele koopera.

“Ha’u la haree iha problema iha Telemor Fintec, karik iha kestaun ruma ho empreza Telemor telekomunikasaun nian karik maibé la’ós Telemor Fintech,” nia akresenta.

Dadaun ne’e, BCTL parseria ho Telemor Fintech hodi implementa  programa kampo dijitál liuhosi produtu mosan ka karteira dijitál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here