Manuel Vicente Talik da Cruz dos Reis.Imajen/Felicidade Ximenes.

LIQUIÇA, 28 novembru 2020 (TATOLI)—Manuel Vicente Talik da Cruz dos Reis, oan husi Saudoza Dulce da Cruz alias wewe, rekoñese feto mós fó kontribuisaun  maka’as ba prosesu luta ba ukun rasik an.

Nia hato’o asuntu ne’e hafoin simu kondekorasaun ordem Timor-Leste husi Prezidente Repúblika, Francisco Guterres Lú Olo, ne’ebé rekoñese saudoza nia luta durante prosesu libertasaun nasionál iha serimonia komemorasaun tinan 45 proklamasaun independensia unilaterál ba dala 45 ne’ebé hala’o iha Munisípiu Liquiça, sábadu ne’e.

“Ha’u simu kondekorasaun ordem Timor-Leste, ha’u nia inan Dulce da Cruz alias wewe ne’ebé mak mate ba rai ida ne’e nia mate bainhira inimigu sira lori lakon iha Munisípiu Viqueque nian iha tinan 1979″, dehan nia.

Nia dehan agradese ba Estadu tanba kondekora ona sira-nia inan ninia luta durante prosesu libertasaun nasionál.

“Tanba sira-nia sakrifísiu no sira sara an ba rai ida ne’e mak bele sai fini no inspirasaun ba sidadaun hotu-hotu atu serbí ba rai ida ne’e la’ós serbí ba polítika  de’it maibé serbí ba agrikultór, peskadór,  bainhira ita halo servisu ita fó onra no fo valoriza ba sira nia mate ne’ebé mak iha,’’katak nia.

Ho sira-nia luta maka ohin loron liberta nasaun ne’e husi inimigu hodi hetan ukun rasik an.

Jornalista: Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here