Prezidente Repúblika, Francisco Guterres Lú Olo. Imajen TATOLI/António Gonçalves

LIQUIÇÁ, 28 novembru 2020 (TATOLI)–Komemorasaun 28 Novembru ba dala 45 ne’ebé mak Estadu Timor-Leste (TL) deside hodi selebra iha Munisípiu Liquiçá, nu’udar maneira ida atubele hamorin aswa’in sira-nia memória nu’udar mártir TL nian.

“Kondekoradu na’in-19 la hamutuk ona ho ita ohin loron. Nune’e, serimónia rekonesimentu ida-ne’e, Estadu TL hamorin sira-nia memória nu’udar aswa’in no mártir TL nian no haksolok ho sira-nia família iha loron ohin,” Prezidente Repúblika, Francisco Guterres Lú Olo hateten liuhusi nia diskursu, iha Lauhata, Munisípiu Liquiçá, sábadu ne’e.

Ho haksolok boot tebes, Xefe Estadu hamutuk ho Governu, Parlamentu Nasionál, Tribunál Rekursu no instituisaun públika sira inklui ho komunidade Liquiçá, aswa’in sira no família mártir, hodi komemora loron 28 Novembru ne’e iha Munisípiu Liquiçá.

“Ita fó onra ba ita-nia erói sira, no ita dignifika loron ohin nu’udar loron ne’ebé ita hahú moris ho sentimentu orgullu iha rai kiik ida-ne’e no ho sentidu povu no nasaun doben TL,” Lú Olo subliña.

Prezidente Repúblika sente orgullu mós tanba liuhosi biban komemorasaun ne’e, nia bele kondekora kondekoradu feto no mane hamutuk 39 ho Orden Timor-Leste.

“Ha’u kondekora ohin maluk aswa’in na’in- 39 ho Orden Timor-Leste. Tanba, durante ne’e, sira mak fó sira-nia an tomak ba luta libertasaun nasionál liuhosi frente klandestina no frente armada,” eis gerileiru ne’e haklaken.

Jornalista: Osória Marques

Editór: Xisto Freitas

HAKEREK NO HATÁN

Please enter your comment!
Please enter your name here