Doutór Andrezinho Belo ho nia ekipa hosi SABEH hala’o tratamentu saúde ba komunidade kbiit laek no veteranu-sira iha Munisípiu Viqueque. Imajen/SABEH

DILI, 28 novembru 2020 (TATOLI)- Mezmu iha tempu moris sosiál no ekonómiku ne’ebé karun, inklui asisténsia saúde ne’ebé karun tebes iha ohin loron, maibé ba Timor-Leste sei iha doutór profisionál  ida ne’ebé ho domin-boot no vontade-hotu hodi halo asaun “karitativa” hodi fó konsulta gratuita  no fahe ai-moruk gratuita ba povu kbiit laek-sira, inklui veteranu no kombatente ba libertasaun nasionál-sira.

Doutór Andrezinho Belo ho ekipa bá vizita avó-feto ida ne’ebé mesak tau matan ba nia bei-oan na’in- tolu ne’ebé ho kondisaun defisiente durante tempu kleur ona. Imajen/SABEH

Doutór Andrezinho Belo, médiku jerál no nu’udar  mós diretór hosi organizasaun la’ós governu nian (ONG) Saúde ba Ema Hotu (SABEH), kontinua fahe nia domin liuhosi asaun “karitativa” hodi fó tratamentu saúde gratuita ba pasiente-sira. To’o nia tenke sakrifika nia saúde no nia forsa tomak hodi la’o ba pasiente-sira nia horik-fatin iha territóriu Timor-Leste hodi atende hirak ne’ebé presiza nia tulun no presiza asisténsia médiku.

Durante loron haat liubá, hosi loron 16 to’o 19 novembru, SABEH ne’ebé doutór Andrezinho Belo lidera hala’o atividade Medical Outreach iha Munisípiu Viqueque, hodi halo tratamentu ka check up ba komunidade kbiit laek-sira ka  pasiente hamutuk na’in 1.289. Hosi númeru pasiente-sira-ne’e, veteranu hamutuk na’in-80.

Tebes! Profisaun doutór “muito nobre”.  Tanba profisaun ida-ne’e fó atendimentu ba povu ho karater no umanidade.

Doutór tenke iha karizma no domin-boot ba povu hodi halo atendimentu no fó asisténsia médiku ba povu liuhosi nia knar ka profisaun. Ida-ne’e  hatudu duni hosi pratika loroloron doutór Andrezinho Belo, ne’ebé servisu hamutuk ho entidade Estadu, hanesan  Prezidénsia Repúblika, Ministériu Saúde no Krús Vermella, hodi hala’o knar umanidade fó konsulta saúde  gratuita ba povu no ba kbiit laek-sira.

Doutór Andrezinho Belo, liuhosi telefónika ba Agência Tatoli, sesta (27/11), haktuir, programa Medical Outreach ida-ne’e iha objetivu atu fó tratamentu saúde ba komunidade, veteranu ho kombatente libertasaun nasionál-sira ne’ebé difisil tebes atu hakat ba sidade atu hetan tratamentu saúde tanba limitasaun rekursu finanseira, inklui ladún iha fízika di’ak atu halo viajen ho distánsia dook.

Ho atendimentu saúde gratuita tama to’o aldeia, suku no area remota-sira, nu’udar apresiasaun pozitivu ne’ebé doutór Adrenzinho Belo ho nia ekipa kontribui no presiza ema hotu atu banati tuir.

Iha Munisípiu Viqueque, númeru pasiente ne’ebé nia ho nia ekipa atende pertense ba Suku Irabin de Cima, Suku Bahatata, Aldeia Neli-Uai Bubulale, Suku Afaloicai iha Aldeia Daralari, Postu Administrativu Uatucarbau.

Alende ne’e, iha Postu Administrativu Uato-Lari,  maka pasiente-sira iha Suku Macadiqui, Aldeia Bubulita, Aldeia Haenadere no Aldeia Edemumu.

Iha Postu Administrativu Viqueque Villa, Sentru Komunitária Krarás no iha Postu Administrativu Ossu, Suku Builo ho Suku Uabubo.

Doutór Andrezinho  ne’ebé remata nia estudu iha Fakuldade Medisina Jerál, Universidade Padjadjaran, Bandung, Indonézia, iha tinan 2011, fó atendimentu médiku ba ema ho idade oioin. Iha atividade “karitativa” iha Munisípiu Viqeuque, nia ho nia ekipa fó atendimentu ba pasiente hosi idade 0-5 hamutuk na’in 140, idade 6-16 (160), idade 17-49 (480) no  idade 50 ba leten hamutuk na’in-509.

“Hosi tratamentu saúde ba komunidade, veteranu no antigu kombatente iha area Viqueque, moras ne’ebé rejista aas liu mak Infesaun Respiratóriu Aguda (IRA), Ipertensaun Alta (HTA), Gastritis no Dermatitis,” doutór Andrezinho Belo haktuir.

Nia mós informa katak, iha momentu ne’ebé hanesan SABEH hala’o mós  promosaun Saúde individuál no hala’o vizita domisiliáriu.

Durante tempu servisu ida ne’e, nia salienta, SABEH mobiliza nia voluntáriu hamutuk na’in-26, kompostu hosi médiku jerál na’in-17, enfermeiru na’in-lima (5), pesoál Saúde Públika na’in-tolu (3) no Motorista na’in-ida (1) akompaña hosi ekipa Palásiu Prezidente (Casa Civil no Casa Militár) no Krús Vermella Timor- Leste (CVTL).

“Iha suku Macadiqui, ekipa Serbisu Saúde Konjunta bá vizita ávo-feto ida ne’ebé mesak tau matan ba nia bei-oan na’in- tolu ne’ebé ho kondisaun defisiente durante tempu kleur ona no sai preokupasaun ba nia família. Avo feto ida ne’e presiza urjente kadeira roda ba nia bei-oan na’in-tolu,” nia hateten.

Lori ekipa voluntáriu  SABEH nia-naran, Andrezinho Belo, la haluha agradese no hakarak hato’o obrigadu wain ba doutór-sira, veteranu-sira, antigu kombatente-sira no komunidade iha Viqeuque, ne’ebé fasilita vizita ne’e.

ONG Saúde Ba Ema Hotu (SABEH) nu’udár fatin voluntáriu ba médiku-sira atu serbí komunidade iha área rurál ho voluntáriamente.

Jornalista   : Cipriano Colo

Editór        : Francisco Simões

HAKEREK NO HATÁN

Please enter your comment!
Please enter your name here