Ekipa PDHJ ne'ebé lidera hosi Provedora Jesuína Maria Ferreira Gomes, partisipa iha enkontru virtuál membru SEANF. Imajen/PDHJ

DILI, 27 novembru 2020 (TATOLI)v- Liuhosi reuniaun forum anuál South East Asian National Human Right Institutions Forum (SEANF) ho plataforma Cisco Webex (online) iha tinan ne’e, ekipa téknika SEANF nian deside hodi hasai deklarasaun ida atu fó protesaun ba migrante durante surtu COVID-19.

Notísia Relevante : PDHJ partisipa enkontru virtual forum SEANF

Provedora Direitu Umanu no Justisa (PDHJ), Jesuína Maria Ferreira Gomes, ne’ebé reprezenta Timor-Leste hodi partisipa mós iha reuniaun, ohin, iha nia edifísiu PDHJ, Caicoli, Dili, iha reuniaun ne’e halo mós anotasaun ba deklarasaun ida hosi membru SEANF-sira hotu kona-ba situasaun migrante ho nia membru família-sira liu-liu liga ho surtu COVID-19.

Nia esplika, membru sira  SEANF konkorda ho deklarasaun ne’e, tanba migrante-sira presiza duni tratamentu hosi Estadu.

“Migrante ne’e universal, hanesan ita ba sai migrante iha ema-nia rain no ema seluk mai sai migrante iha ita-nia rain,” Provedora Jesuína Maria Ferreira Gomes esplika.

Nia hatutan, deklarasaun ne’e hanesan devér instituisaun direitu umanu  atu fó hanoin ba Estadu no Governu husi nasaun-neen, katak, durante surtu COVID-19, labele halo diskriminasaun ka tratamentu la hanesan ba migrante-sira.

“Diskusaun -sira ne’e la’o  ita fó kontribuisaun matéria-sira tanba diskusaun-sira ne’e  hanesan kontinuasaun ba enkontru tékniku ne’ebé antes ne’e hala’o ona,” nia fó hanoin.

Jesuína mós rekoñese katak, maski Timor-Leste seidauk tama ba membru ASEAN, maibé bele hola parte ona iha SEANF no konsege aprende buat barak ho nasaun membru sira SEANF nian, liuliu ko’alia kona-ba asuntu direitu umanu, festivál direitu umanu, partilla dokumentu informasaun hodi troka esperiénsia ba malu ho sira seluk tan.

Tuir loloos enkontru anuál SEANF  ba tinan ne’e Komisaun Direitu Umanu (Komnas HAM) Indonézia mak sai uma-na’in iha Jakarta, maibé ho situasaun surtu Covid-19 ne’ebé ataka nasaun hotu iha mundu mak, realiza de’it liuhosi plataforma Cisco Webex durante loron tolu; hosi loron 24-26 novembru 2020.

South East Asia National Human Rights Institutions Forum  (SEANF) ka  forum Instituisaun Nasionál Direitu Umanu Sudeste Aziátiku hanesan rede Sub-Rejionál Instituisaun Nasionál Direitu Umanu neen (6) hanesan the Indonesian National Human Rights Commission (Komnas HAM), the Human Rights Commission of Malaysia (SUHAKAM), the National Human Rights Commission of Thailand (NHRCT), The Myanmar National Human Rights Commission (MNHRC), the Commission on Human Rights of the Philippines (CHRP) no Provedoria  Direitu Umanu no Justisa (PDHJ) Timor-Leste.

SEANF estabelese iha 2004, iha Bangkok-Tailándia, inisia hosi nasaun-haat  (4) hanesan Indonézia, Malázia, Filipina no Tailándia.

Iha 2009, Timor-Leste sai hanesan membru ba dala-lima  no iha 2012 Myanmar sai hanesan membru ba dala-neen.

Objetivu jerál hosi SEANF maka organiza membru-sira hanesan mekanizmu rejionál atu halo promosaun ne’ebé efikás, protesaun no hakonu direitu umanu ema hotu nian iha nasaun membru iha Sudeste Aziátiku.

Programa no atividade SEANF iha issue direitu umanu lima ne’ebé sai hanesan issue komún maka, terrorizmu, tráfiku umanu, protesaun ba migrante no traballadór migrante, promosaun ba direitu ekonómiku, sosiál no kulturál no mós direitu ba edukasaun.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here