Ministru Transporte Komunikasaun, José Agostinho da Silva. Imajen TATOLI/Egas Cristovão

DILI, 27 novembru 2020 (TATOLI)—Iha tinan 2020 nia-laran, Ministériu Transporte no Komunikasaun (MTK) konsege hatama reseita millaun $7 ba kofre Estadu.

Ministru Transporte no Komunikasaun, José Agustinho da Silva, informa ministériu rekolla reseita liuhosi diresaun sira ne’ebé ligadu ho atendimentu públiku, hanesan Diresaun Nasionál Transporte no Terrestre (DNTT), Autoridade Portuáriu Timor-Leste (APORTIL), no diresaun no ajénsia autónomu seluk tan.

“Hosi Orsamentu Jerál Estadu 2020 ho montante kuaze millaun $7 ba Ministériu Transporte no Komunikasaun, ami ezekuta no konsege hatama fali retornu ba kofre Estadu millaun $7,” Ministru José Agustinho, hateten iha Palásiu Governu, sesta ne’e.

Notísia RelevanteOJE 2020: ezekusaun MTK atinje 88,58%

Reseita mai hosi kanál parte diresaun ida-idak hanesan DNTT ninia kanál bele rekolla reseita hosi parte hanesan rejistu veíkulu no atibuisaun karta kondusaun.

“Ida-ne’e liga ba atendimentu públiku, ita-nia sidadaun nu’udar kliente entaun atendimentu la’o no reseita mós la’o nune’e mós diresaun seluk,” nia akresenta.

Entretantu, orsamentu tinan ne’e, ba MTK hamutuk millaun $6.571, fahe ba kategoria saláriu no vensimentu millaun $1,397, bens no servisu millaun $4.99, transferénsia públika $623.000, kapitál menór $236.000, no kapitál dezenvolvimentu $217.000.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here