Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 27 novembru 2020 (TATOLI)—Komisaun C (Finansa Públika) liderada Deputada Maria Angélica Rangel, sei aprova relatóriu no paresér kona-ba faze audiénsia públika ba proposta-lei Orsamentu Jerál Estadu (OJE) 2021.

Notísia Relevante: PN sei debate OJE 2021 iha 30 novembru

“Relatóriu no paresér atu konklui ona, espera katak ohin ami konklui atu nune’e fahe ba deputadu sira no ami sei aprova iha loron 30 novembru dadeersan no ami sei hahú debate iha 30 novembru, tuku 15.00 lokraik,” Prezidente Komisaun C, Deputada Maria Angélica Rangel, informa ba jornalista sira iha resintu Parlamentu Nasionál, sesta ne’e.

Prezidente Komisaun C ne’e fó-sai katak, debate ba proposta-lei OJE 2021 faze jeneralidade nian durante loron  3 no espesialidade loron 7 inklui finál global. Nia nota iha dokumentasaun orsamentál hosi proposta-lei ne’e barak iha errata.

“Errata ne’e normál tanba kada tinan Governu aprezenta orsamentu mai sempre iha errata. Signifika koresaun ruma Governu tenke hadi’a,” nia dehan.

Deputada Bankada FRETILIN ne’e hateten, Orsamentu ba 2021 errata barak tanba orsamentu ne’e la hanesan bainbain maibé orsamentu kada programa, liuliu errata iha alokasaun orsamentu.

“Errata ne’e tanba mudansa sistema tanba uluk orsamentu mai ho nia órgaun sira maibé orsamentu 2021 ne’e iha tabela II deputadu sira atu aprova ne’e kada programa. Tanba ne’e mak iha kestaun téknika barak mak tenke hadi’ak, tanba ne’e mak mosu errata ne’e,” nia hateten. 

Prezidente Komisaun C ne’e seidauk bele fó-sai paresér ne’ebé sei rekomenda ba plenária tanba aprova tia iha komisaun C mak bele fó-sai.

Reprezentante povu sira sira sei diskute no aprova proposta OJE 2021 hamutuk biliaun $1.895 kompostu hosi saláriu no vensimentu millaun $ 239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Iha Planu Anuál Governu nian 2021 reflete kontinuasaun traballu reforma jestaun finansa públika, ne’ebé inisia susesivu Governu nian liuhosi Roteiru orsamentasaun kada programa.

Tinan fiskál 2021 hanesan tinan finanseiru dahuluk ba departamentu hotu-hotu, institutu no entidade públika sira iha Governu implementam orsamentu kada programa.

Bazea ba livru 2 (planu anuál) deskreve iha OJE 2021 integra programa hamutuk 141, sub-programa 431 no totál atividade hamutuk 1,837.

Kuadru Planeamentu kona-ba orsamentasaun kada programa bazea ba Planu Estratéjiku Dezenvolvimentu (PED) 2011-2030 no Objetivu Dezenvolvimentu Sustentável (ODS) 2030, hanesan dokumentu estratéjiku no dokumentu polítiku.

Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here