Logo RTTL.ep. Impajen/Espesiál

DILI, 27 novembru 2020 (TATOLI)—Komisaun A (Justisa no Konstitusionál) lideradu Deputadu Joaquim dos Santos ‘Boraluli’ rekomenda ba Ministériu Finansa (MF) atu halo transferénsia verba adisionál rihun $140,8 hosi rúbrika dotasaun todo governu hodi asegura pagamentu saláriu no vensimentu ba funsionáriu destakadu RTTL na’in-33.

Prezidente Komisaun A, Deputadu Joaquim dos Santos “Boraluli” rekomenda ba Ministériu Finansa no Komisaun Funsaun Públika (KFP) atu transfere verba adisionál ho montante rihun $140,8 ba funsionáriu na’in-33 ne’ebé durante ne’e destakadu iha Sekretaria Estadu Komunikasaun Sosiál (SEKOMS) ba ministériu ne’ebé funsionáriu ida hala’o knaar.

“Ami rekomenda funsionáriu sira sai hosi RTTL destaka ba iha instituisaun sira seluk ne’e, sira-nia osan mós tenke tranzita tenke tuir kedas ba ministériu ne’ebé sira hala’o knaar, labele funsionáriu ida servisu iha departamentu ida maibé osan tau fali iha departamentu seluk, liuliu funsionáriu na’in-33 hosi RTTL ne’ebé iha hela Komisaun Funsaun Públika,” Prezidente Komisaun A ne’e informa ba jornalista sira, iha resintu Parlamentu Nasionál, foin lalais ne’e.

Prezidente Komisaun A ne’e esplika, uluk orsamentu hosi funsionáriu na’in-33 ne’e konsentra iha SEKOMS maibé ba 2021 tenke tranzita ba ministériu ne’ebé responsabiliza ba funsionáriu sira-ne’e.

Funsionáriu na’in-33 ne’e sai hosi RTTL tanba mídia públiku ne’e nakfila ba Empreza Públika (EP) iha tinan hirak liubá.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here