Membru Governu balun hamutuk ho jerente CCI-TL, iha Asembleia Jerál ordináriu anuál 2020, ne’ebé realiza iha salaun Katedrál, Villa Verde, sesta (27/11). Imajen TATOLI/ Florêncio Miranda Ximenes

DILI, 27 novembru 2020 (TATOLI)–Iha ámbitu Asembleia Jerál ordináriu anuál 2020 Kámara Komérsiu Indústria Timor-Leste (CCI-TL, sigla portugés) ho tema ‘Organizar para Dezenvolver’, Governu liuhosi Ministériu Koordenadór Asuntu Ekonómiku (MKAE) enkoraja setór privadu kontinua sai parseiru di’ak ba dezenvolvimentu Timor-Leste.

“Eventu ne’e importante, tanba ne’e Governu enkoraja setór privadu iha CCI-TL atu aproveita programa ne’ebé Governu lansa iha planu rekuperasaun ekonómika atu ajuda no partisipa di’ak liutan iha dezenvolvimentu ekonómiku,” Ministru Koordenadór Asuntu Ekonómiku, Joaquim Amaral, hateten iha ámbitu Asembleia Jerál ordináriu anuál 2020 CCI-TL, iha salaun Katedrál, Villa Verde, sesta ne’e.

Tuir Ministru, maski iha situasaun COVID-19 ne’ebé defísil ba ekonomia Estadu no afeta ba emprezáriu sira, maibé Governu iha vizaun atu rekupera ekonomia.

“Ita sura nafatin setór privadu hanesan parseiru dezenvolvimentu, ne’ebé tinan 2020 ita lansa programa barak atu ajuda,” nia akresenta.

Governante ne’e husu ba membru CCI-TL ne’ebé partisipa iha programa no polítika rekuperasaun ekonómika atu kolabora ho di’ak halo susesu.

“Ita hakarak no esforsu maka’as kontinua apoia Kámara Komérsiu liuhosi reforma lejizlasaun sira atu kontinua haforsa no hakbiit, nune’e bele kontribui ba prosesu dezenvolvimentu iha Timor-Leste,” nia realsa.

Aleinde ne’e, Governu sei kontinu akompaña no haree atu akumula setór privadu ninia ezijénsia, hodi buka dalan no rezolve gradualmente, hanesan hafásil asesu ba kréditu.

CCI-TL husu Governu implementa dekretu-lei pre-kualifikasaun

Iha fatin hanesan, Prezidente CCI-TL, Oscar Lima, hateten intensaun realiza asembleia ne’e atu fó lejitimidade ba Kámara Komérsiu hodi haforsa no hakbiit hamutuk, nune’e bele kontribui ba dezenvolvimentu rai laran.

“Iha asembleia ne’e, ami ezije nafatin Governu atu implementa dekretu-lei pre-kualifikasaun, tanba se lae bele hamate ita-nia emprezáriu, tanba projetu millaun $1 mai kraik maka bele fó ba emprezáriu nasionál, maski ami-nia kapasidade atu ka’er obra sira to’o millaun $10,” dehan emprezáriu timor-oan ne’e.

Oscar Lima agradese Governu tanba hahú esforsu-an atu reforma lejizlasaun sira ne’ebé difikulta emprezáriu timor-oan.

Iha seremónia ne’e, Prezidente CCI-TL husu ba emprezáriu sira hanesan membru Kámara Komérsiu, atu ezekuta fiar ne’ebé Governu fó ona liuhosi projetu Estadu sira ho di’ak no garante kualidade.

“Ita tenke iha resposabilidade ba sasán ne’ebé ita simu husi Governu, liuliu obra Estadu tenke halo ho kualidade hodi hatudu katak timor-oan mós bele, labele na’in-ida mak halo a’at maibé ema hotu nia naran foer,” Oscar lima fó hanoin.

Hatan ba kestaun ne’e, Ministru Obra Públika, Salvador Eugênio Soares dos Reis Pires, enkoraja setór privadu sira atu prepera-an partisipa iha dezenvolvimentu iha área infraestrutura.

“2021 Governu tau osan barak liu iha setór infraestrutura, ne’ebé prepara-an iha jestaun, organizasaun no finasiamentu. Governu prontu apoia, liuliu iha reforma lejizlasaun atu hafásil konkorre iha konkursu públiku,” Ministru Salavador afirma.

Nia promete, atu implementa dekretu-lei pre-kualifikasaun ho di’ak atu emprezáriu timor-oan sira bele konkorre projetu ho finanseiru boot iha Timor-Leste.

Seremónia ne’e partisipa hosi emprezáriu hosi munisípiu 12 inklui Rejiaun Administrativa Espesiál Oé-cusse Ambeno (RAEOA) ne’ebé hanesan membru, ho baze Estatutu artigu 13° katak Asembleia Jerál ordinária sei reuni tinan-tinan, ho kompeténsia atu diskute no aprova planu asaun no orsamentu tinan fiskál, diskute no vota valór joia no kuota, nomea membru onoráriu bainhira iha proposta no trata asuntu seluk tan.

Daudaun emprezáriu ne’ebé rejistu iha CCI-TL iha 12 munisípiu inklui RAEOA hamutuk 10.000.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here