Sekretáriu Estadu Formasaun Profisionál no Empregu, Alarico do Rosário Imajen TATOLI/Egas Cristovão

DILI, 27 novembru 2020 (TATOLI)Governu liuhosi Sekretaria Estadu Formasaun Profisionál no Empregu (SEFOPE) sei haruka traballadór hamutuk 162 bá Austrália.

Sekretáriu Estadu Formasaun Profisionál no Empregu, Alarico do Rosário, hala’o sorumutuk ho Primeiru-Ministru (PM), Taur Matan Ruak, hodi diskute hamutuk kona-ba transporte (aviaun) ba traballadór sira.

“Bazeia ba kontratu ne’ebé ajénsia haruka mai SEFOPE hamutuk 162, tanba ne’e ami halo diskusaun ho Primeiru-Ministru kona-ba transporte, oinsá atu buka solusaun ba ida-ne’e,” Sekretáriu Estadu Alarico do Rosário, informa hafoin hasoru PM Taur, iha Palásiu Governu, sesta ne’e.

Governante ne’e dehan, solusaun maka Governu Timor-Leste sei koordena ho Governu Austrália ba asuntu ne’e.

Tuir planu traballadór sira sei arranka ba Austrália entre loron 01 to’o 04 dezembru tinan ne’e.

Aleinde ne’e, ko’alia mós kona-ba traballadór timor-oan ba Korea Súl.

“Ita sei ko’alia oinsá atu aluga aviaun, sei ko’alia mós kona-ba atu tama kuarentena tanba tama kuarentena selu ho taxa boot,” nia akresenta.

Kandidatu traballadór timor-oan atu serbisu iha Korea Súl ne’ebé iha ona kontratu hamutuk 465 no na’in-37 sosa ona billete aviaun.

Biban ne’e, Sekretáriu Estadu ne’e, relata asuntu prosesu konstrusaun sentru exelente, ne’ebé ninia prosesu to’o ona iha Ajénsia Dezenvolvimentu Nasionál (ADN) atu verifika dokumentu no sei halo diálogu ho komunidade afetadu ba konstrusaun iha Metinaro.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here