Imajen/Espesiál.

DILI, 27 novembru 2021 (TATOLI)—Progresu ezekusaun Orsamentu Jerál Estadu (OJE) 2020 hosi Parlamentu Nasionál to’o loron ohin atinje ona 81.7% hosi montante orsamentu $12,039,884.00.

Parlamentu Nasionál nu’udar órgaun soberania iha Repúblika Demokrática Timor-Leste, nu’udar mós reprezentativu sidadaun hotu-hotu nian ho podér lejizlativa, fiskalizasaun no desizaun polítika, bazea Konstituisaun Repúblika artigu 92.

Orsamentu Privativu Parlamentu Nasionál ho montante millaun $12,039.885 aprova iha 27 jullu 2020 liuhosi projetu rezolusaun nº 54/ V (2ª) ho rezultadu votasaun a-favór 54, kontra 0 no abstensaun 0.

Hosi montante orsamentu millaun $12.039.884 ne’ebé fahe ba saláriu no vensimentu millaun $5.556.507 (46,2%), bens no servisu millaun $5.124.540 (42,6%), kapitál menór rihun $96.919 (0,8%), kapitál dezenvolvimentu rihun $3.919 (0,03%) no transferénsia públika millaun $1.258.000 (10,5%).

Tuir portál Ministériu Finansa nian ne’ebé Aência TATOLI asesu, to’o loron sesta, tuku 14.00 meudia ezekuta ona $9,475,576.38 (81.7%), saldu hela $2,031,709.46. Purtantu kompromisu sira $168,851.10 no obrigasaun $363,747.06.

Medida prinsipál ne’ebé Parlamentu Nasionál ezekuta liuhosi rejime duodesimál durante tinan fiskál 2020 mak hanesan ezerse efetivamente funsaun konstitusionál Parlamentu Nasionál nian, liuhosi reforsa kapasidade interna, hala’o ezekusaun funsaun fiskalizasaun ba asaun Governu nian no Administrasaun Públika ho di’ak, implementa polítika jéneru.

Nune’e mós promove kultura abertura no transparansia iha Parlamentu Nasionál, inklui partisipasaun sosiedade sivíl iha kualkér atividade parlamentár no lejizlativa ho transparente iha prosesu desizaun polítika no fiskalizasaun asaun governativa.

Durante tinan fiskál 2020 nian, Parlamentu Nasionál lideradu Aniceto Longuinhos Guterres Lopes, kontinua reforsa governasaun di’ak, jestaun institusionál no reforsa kapasidade rekursu umanu iha Parlamentu Nasionál.

Entretantu ezekusaun jerál (instituisaun estadu tomak) ba OJE 2020 to’o ohin atinje 60.9% hosi montante orsamentu  $1,497,042,620.00. Hosi orsamentu biliaun $1,4-resin ne’e ezekuta ona $880,428,982.01 no saldu hela $484,528,970.71.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here