Primeiru-Ministru, Taur Matan Ruak. Imajen Tatoli/Egas Cristovão

DILI, 26 novembru 2020 (TATOLI)-Primeiru Ministru, Taur Matan Ruak, fó parabéns ba timor-oan tomak, ba komemorasaun loron Proklamasaun Independénsia ba dala-45 iha loron 28 novembru.

“Ha’u kontente loos no ha’u parabeniza povu Timor-Leste ba konkista ida-ne’e, fó saudasaun espesiál liu ba família hotu ne’ebé lakon sira-nia oan hodi ohin loron ita moris no sai nasaun ida ukun rasik-an,” Xefe Governu afirma iha Pálasiu Prezidensiál, kinta ne’e.

Iha komemorasaun tinan ne’e, Estadu kontinua halo esforsu maka’as atubele dezenvolve nasaun no halakon ki’ak no mukit inklui hadi’a moris sidadaun.

Maski eis Prezidente Repúblika ne’e rekoñese, iha prosesu dezenvolvimentu la fásil tanba nasaun balun ukun-an tinan barak ona, maibé sei susar halakon ki’ak.

“Ita ukun-an tinan 20 ona, ita labele halo milagre, maibe ha’u orgullu loos tanba Timor-Leste foin ukun-an maibé iha avansu barak ein termu ekonómiku no demokrasia, maski barak iha dezenvolvimentu fíziku no iha buat barak seidauk to’o buat ne’ebé ita hotu hakarak, maibé hanesan prosesu ida atu jerasaun ne’e kontinua no tuir jerasaun foun kontinua tan,” nia akresenta.

PM Taur dehan, Estadu sei kontinua eziste, maski jerasaun tuan no foun ne’e mate hotu, maibé jerasaun tuir mai sei kontinua atu dezenvolve nasaun ne’e sai dezenvolvidu iha mundu rai klaran.

“Ita sira mate troka malu, maibé Timor-Leste sei kontinua atu ki’ak labele iha, ema tenke iha empregu, uma tenke di’ak, eskola tenke di’ak, bee-moos tenke iha, saúde tenke di’ak, no eletrisidade labele mate,” nia fó hanoin.

Xefe ezekutivu husu ba sidadaun hotu atu hametin unidade nasionál hodi garante páz no estabilidade hodi kontribui ba dezenvolvimentu nasionál.

Entretantu, seremónia nasionál ba komemorasaun Proklamasaun Independésia 28 novembru, sei realiza iha munisípiu Liquiçá no selebra mós iha munisípiu sira iha territóriu laran inklui Rejiaun Administrativa Espesiál Oé-cusse Ambeno (RAEOA).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here