Primeiru-Ministru, Taur Matan Ruak. Imajen Tatoli/Egas Cristovão

DILI, 26 novembru 2020 (TATOLI)–Primeiru-Ministru (PM), Taur Matan Ruak, enkoraja Provedória Direitu Umanu no Justisa (PDHJ, sigla portugés) no Komisaun Antí-Korrupsaun (CAC, sigla portugés) atu kontrola implementasaun iha terrenu.

Xefe Governu hato’o lia hirak ne’e hafoin akompaña no rona lamentasaun husi komunidade katak programa implementasaun programa Cesta Bázika la to’o $25 ba kada ema.

“Ha’u  haree no rona komunidade manifeta, maíbe ha’u hanoin ministériu sira ne’ebé toma konta atividade liga iha terrenu no sidadaun sira sei haree atubele hadi’a,” Xefe Governu tenik hafoin enkontru semanál ho Prezidente Repúblika, Francisco Guterres ‘Lú Olo’ iha Palásiu Prezidensiál, kinta ne’e.

Xefe ezekutivu ne’e rekoñese, Cesta Bázika hanesan  programa foun no Governu aprende iha implementasaun.

“Ita foin hahú ne’e, naturalmente  ita aprende implementasaun, ne’ebé  laós envolve Governu de’it, maibé ajénsia no emprezáriu sira ne’ebé ajuda fahe produtu sira,” PM Taur akresenta.

Tuir nia, Governu iha nosaun atu kontinua serbisu hadi’ak liután no enkoraja instituisaun sira atu kontrolu maka’as liután.

“Ita hakarak PDHJ, CAC no Inspetór Jerál kontrola ho hanoin ida katak se ita hadi’a di’ak liu ne’e ha’u hanoin bele halo ema hotu kontente,” Xefe Governu enkoraja.

Nune’e, Eis Prezidente Repúblika ne’e husu ba Ministériu implementadór, emprezáriu no sidadaun hotu atu koopera hamutuk atu programa bele la’o ho susesu.

Programa Governu ba kurtu prazu ne’e hahú lansa ona iha munisípiu sira iha ámbitu rekuperasaun ekonómiku, ho produtu distribuisaun maka foos, mina bimoli, manu-tolun, foremungu, koto, masin, rinso, pasta-dente, manu broiller no seluk tan.

Jornalista: Florêncio Miranda Ximenes

Editra: Julia Chatarina

HAKEREK NO HATÁN

Please enter your comment!
Please enter your name here