Estudante sira halo apresentasaun iha eskola EBC 30 Agostu Komoro hodi komemora loron mundial siensia matematika, Kinta 26 Novembru 2020.Imajen Tatoli/Antonio Goncalves

DILI, 26 novembru 2020 (TATOLI)—Vise Ministru Edukasaun Juventude no Desportu, António Guterres, hateten Timor-Leste sei enfrenta problema menus rekursu umanu atu dezenvolve siénsia no matemátika iha Timor-Leste.

Vise-Ministru Edukasaun Juventude no Desportu (MEJD), António Guterres Imajen/Osória Marques.

“Ha’u konsidera durante tinan 18 nian laran dezenvolvimentu siénsia iha ita-nia rai ne’e sei kontinua hasoru dezafiu bo’ot tebes tanba ita sei falta iha rekursu umanu maski ita iha ona fasilidade,” dehan nia durante selebrasaun loron mundiál siénsia no matemátika iha Eskola Ensinu Báziku 30 Agostu Comoro Dili, kinta (26/11).

Notísia Relevante :Japaun husu TL dezenvolve maka’as iha siénsia matemátika

Mezmu Timor-Leste daudaun ne’e sei hasoru dezafiu atu dezenvolve siénsia no matemátika maibé nia fiar katak Estadu no Governu sei tau mós iha planu prioridade hodi dezenvolve di’ak liután iha futuru.

“Ita nafatin iha kompromisu tau matan ba eskola sira hotu liuhusi ita-nia estudante sira hahú husi eskola pre-eskolár ba to’o estudante Ensinu Tékniku Vokasionál sira no liliu siénsia naturál,” nia hateten.

Siénsia mak save importante apoiu dezenvolve rekursu umanu ida kualifikadu hodi aselera prosesu dezenvolvimentu nasionál.

“Bainhira siénsia forsa koñesimentu forsa nasaun mós sei sai forte liután tanba ne’e Governu nafatin iha komitmentu godi luta makas atu liberta foinsa’e sira iha edukasaun formal no naun formál atu eduka no forma sira atu hametin koñesimentu iha papel sosiadade ninian liuhusi siénsia ne’e rasik,” tenik tan.

Iha fatin hanesan Sekretáriu Jerál Komisaun Nasionál Timor-Leste ba UNESCO, Francisco Barreto, konsidera siénsia importante ba ema idaidak no sosiedade tanba ne’e, sientista Timoroan sira persiza dezenvolve no habelár siénsia no halo peskiza atu asegura sustentabilidade siénsia ne’e rasik iha sosiedade nia leet.

“Husi siénsia ne’e rasik ita mós bolu atensaun hodi haree dezafiu ne’ebé siénsia hasoru hodi sai esforsu ida sientífiku nian,”dehan nia.

Komisaun Nasionál Timor-Leste ba UNESCO hanesan orgaun outónomu ida ne’ebé turtela iha Ministériu Ensinu Superiór Siénsia no Kultura nia okos ho papel importante atu dezenvolve prioridade iha edukasaun, siénsia kultura, komunikasaun no informasaun.

 Notísia Relevante :Estudante São Pedro prodúz ai-moruk halo filtrasaun bee fo’er

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here