DILI, 26 novembru 2020 (TATOLI) – Tribunál Distritál Dili (TDD) adia julgamentu ba prosesu krime importasaun no fa’an sasán ilísitu ne’ebé deskonfia envolve arguidu JH ho RTS.
Juis prosesu Ivan Suritai hateten, Tribunál labele hala’o julgamentu tanba juis adjunta ida sei iha lisensa serbisu no asuntu família.
“Prosesu ne’e presiza koletivu juis. Tribunál tenta ona atu buka juis substitutu, maibé la konsege tanba juis-sira iha Tribunál okupadu ho prosesu seluk. Nune’e, ha’u deside adia fila-fali julgamentu ne’e ba loron 7 janeiru 2021, tuku 9:00 dadeer,” Juis Ivan Suritai pronunsia iha sala audiénsia julgamentu, Kinta ne’e.
Defensór Públiku hato’o mós rekerimentu ba Tribunál atu nomeia tan defensór na’in-ida, tanba arguidu na’in-rua iha konflitu interese. Nune’e Tribunál mós aseita pedidu DP nian.
Tuir informasaun ne’ebé Agência Tatoli asesu hosi Ministériu Públiku (MP) ba prosesu ne’e, rejista ho númeru Nuc 118/19 PGGCC, katak iha loron 22 outubru 2019, ekipa hosi AIFAESA hala’o inspesaun ba kioske no loza-sira iha área Bidau to’o área Becora, identifika katak iha arguidu JH nia kiós fa’an tabaku ho marka tembakau Cheg (joker), hamutuk kaixa 10.
Iha momentu ne’ebá, ekipa hosi AIFAESA ne’ebé halo inspesaun, halo kedas apreensaun ba tabaku sira-ne’e.
Bainhira ekipa inspesaun hala’o hela inspesaun, arguidu JH mós informa ba ekipa katak, sigarru sira-ne’e nia hola hosi arguidu RTS hamutuk dalima to’o dala-neen ona.
Bazeia ba informasaun ne’e, ekipa inspesaun AIFAESA kontinua hala’o inspesaun iha arguidu RTS nia fatin no konsege identifika katak, arguidu fa’an duni tabaku ilísitu iha ninia fatin ho marka Surya 12 hamutuk slop 80 no tembakau Cheg (joker) hamutuk kaixa haat (4) no ekipa inspesaun halo kedan apreensaun.
Tuir art. 31’ al. c) no art. 12′ n° 9, hosi dekretu lei n° 14/2016, 8 Juñu, konsidera nu’udár produtu tabaku ilísitu ne’ebé proibidu atu sirkula iha merkadu. Atu importa no sosa hanesan tabaku mai Timor-Leste, presiza hetan autorizasaun no mós lisensa hosi Ministériu Saúde, tenke liuhosi Alfándega, maibé arguidu-sira la kumpre obrigasaun hodi viola lei.
Ministériu Públiku promove arguidu-sira nu’udár autór materiál ho forma konsumadu ba krime importasaun ilísita ba sasán merkadoria ne’ebé previstu no punidu iha art. 315 nu.1 hosi kódigu penál.
Kona-ba akuzasaun kompletu, Tribunál seidauk lee sai tanba prosesu julgamentu Tribunál halo adiamentu.
Prosesu julgamentu ne’e Ministériu Públiku reprezenta hosi prokuradór Rogerio Viegas no arguidu-sira hetan asisténsia legál hosi defensór públiku Juvinal Y. Freitas.
Jornalista :Nelson de Sousa
Editór : Francisco Simões
