Komandante Jerál PNTL, Komisáriu Faustino da Costa. Imajen TATOLI/António Gonçalves

DILI, 26 novembru 2020 (TATOLI)--Polísia Nasionál Timor-Leste (PNTL) sei hatun forsa másimu hodi asegura komemorasaun loron Proklamasaun Independesia ba dala-45 iha 28 novembru, iha munisípiu Liquiçá no territóriu tomak inklui seguransa iha Natál 2020 no tinan foun 2021.

“Ami hasoru Prezidente Repúblika hodi informa preparasaun PNTL asegura loron 28 novembru no situasaun jerál territóriu nasionál la’o di’ak no kalma inklui informa asidente  no insidente,” Komandante Jerál PNTL, Komisáriu Polísia Faustino da Costa, tenik hafoin sorumutuk ho Xefe Estadu iha Palásiu Prezidensiál, Bairro-Pité, kinta ne’e.

Komandante Jerál informa mós kona-ba ema balun ne’ebé halo-an hanesan ninja iha munisípiu Ainaro no halo idetifikasaun no detein hodi kontinua prosesu investigasaun.

“Ita envolve forsa másimu, tantu iha parade hanesan mós halo seguransa tanba la’ós de’it selebrasaun nível nasionál maibé sei selebra iha munisípiu tomak no Polísia nafatin asegura,” nia akresenta.

Komisáriu Polísia Faustino apela, iha loron Natál no tinan foun, bandu atu sunu fugete iha fatin públiku, bainhira laiha autorizasaun ruma husi instituisaun relevante sira.

“Ami koordena ona ho MTKI, maibé tátikamente PNTL detein ona ba ema sira ne’ebé halo importasaun ilegál fugete atu prosesu sira  ba Ministériu Públiku,” nia hatutan.

Kona-ba númeru asidente tráfegu, hahú iha outubru iha 160, ne’ebé rezulta timor-oan na’in-13 mak lakon vida no insidente 418, kompostu hosi kazu asaltu, violénsia doméstika, susidu no insidente ne’ebé ema monu rasik to’o mate iha munisípiu Viqueque no Lautém.

Aleinde ne’e, Polísia kontinua halo check point ne’ebé iha outubru, identifika infrasaun hamutuk 1.700 ho totál koima $39.404 ne’ebé hatama ba kaixa Jerál Estadu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here