Komandante Tránzitu Munisípiu Dili, Inspetór Domingos Sarmento Gama. Imajen Tatoli/Eugénio Pereira

DILI, 26 novembru 2020 (TATOLI)- Komandu Jerál Polísia Nasionál Timor-Leste (PNTL) hatún ona despaxu ba Komandu PNTL Dili, Seksaun Unidade Tránzitu hodi implementa regra foun ba infratór-sira ne’ebé nia transporte karreta ka motór hetan apreensaun atu selu multa uza sistema tiketi foun.

Komandante Seksaun Polísia Unidade Tránzitu Dili, Inspetór Xefe Domingos Sarmento Gama, esplika tiketi foun ne’e aplika ba infratór-sira bainhira lori transporte la iha karta kondisaun, dokumentu karreta ka motor nian la iha ka mate no viola regra tránzitu nian sei selu multa tuir lei.

“Hahú ohin ba oin ita sei implementa sistema uza tiketi foun ba infratór-sira ne’ebé maka ita halo check point maka identifika sira komete irregularidade ruma sira sei foti tiketi ne’e hodi ba selu multa iha banku,” Inspetór Xefe Domingos Sarmento Gama, informa ba jornalista, ohin, iha Komandu PNTL, Caicoli, Dili.

Sistema tiketi foun ne’e, Seksaun Tránzitu Dili firma hodi kumprimenta ba  lei konduta estrada Númeru 6/2003.

Tiketi ne’e rasik parte PNTL Dili halo ona distribuisaun ba komandu eskuadra-sira iha Dili hodi implementa iha sira-nia área jurídiku.

PNTL Tránzitu Dili mós alerta ba komunidade  Dili atu koopera hodi fó susesu ba servisu PNTL nian hodi implementa lei no kontrola movimentu transporte labele mosu beibeik asidente no insidente.

Inspetór Xefe Domingos konsidera tiketi foun ne’ebé sira hetan atu bele reforsa liután sira-nia servisu hodi implementa ba komunidade ka motorista-sira ne’ebé halo movimentu iha kapitál Dili.

“Ami husu ba komunidade sira atu labele hakfodak bainhira membru tránzitu-sira implementa sistema uza tiketi ne’e iha terrenu,” nia hateten.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here