Komandante Seksaun Polísia Unidade Tránzitu Dili, Inspetór Xefe Domingos Sarmento Gama. Imajen Tatoli/Eugénio Pereira

DILI, 26 novembru 2020 (TATOLI)- Polísia Munisípiu Dili, ohin, halo operasaun fó aviza no bandu negosiante ambulante-sira ne’ebé komesa okupa trotoar iha area Colmera, Dili, atu halo negósiu roupa ho sapatu-sira.

Komandante Seksaun Polísia Unidade Tránzitu Dili, Inspetór Xefe Domingos Sarmento Gama dehan, negosiante ambulante-sira fa’an ropa iha trotoar-leten no harii baraka negósiu okupa estrada públiku hamosu engarrafamentu maka’as.

“Ita sei halo operasaun hodi sosializa informasaun ba ita-nia negosiante  ambulante-sira ne’ebé fa’an sasán iha trotoar leten. Ita sei bandu no la permite, tanba  sira okupa tiha fali trotoar ne’ebé mak loloos ema la’o sira atu uza,”  Inspetór Xefe Domingos Sarmento Gama, hateten, ohin, ba jornalista iha Komandu PNTL, Caicoli, Dili.

PNTL sei halo koordenasaun ho Prezidente Autoridade Munisípiu Dili no autoridade Suku Colmera hodi halo kontrolu para evita negosiante-sira labele viola regra.

Nia hatutan, tuir lei autoridade suku-sira mós la iha kompeténsia atu fó autorizasaun ba negosiante-sira hodi fa’an sasán iha estrada públiku.

“Trotoar ne’e ha’u hanoin laiha razaun atu autoridade lokál autoriza fali ita-nia negosiante-sira  halo negósiu iha leten,” nia hateten.

PNTL rasik halo ona identifikasaun ba fatin-sira ne’ebé sei halo operasaun maka Colmera, Kampu Alor, Rotunda Prezidnete Nicolau Lobato, Comoro, Audian no estrada Becora ho Merkadu Taibesi nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here