Primeiru-Ministru, Taur Matan Ruak. Imajen TATOLI/Egas Cristovão

DILI, 26 novembru 2020 (TATOLI)—Primeiru-Ministru (PM), Taur Matan Ruak, hateten razaun Governu propoin Prezidente Repúblika, Francisco Guterres ‘Lú Olo’, halo renovasaun Estadu Emerjénsia (EE) daualu ba loron-30 tanba atu evita COVID-19.

“Ita-nia kazu pozitivu rekupera hotu ona maibé atu prevene, tanba ne’e husu Prezidente Repúblika atu halo estensaun Estadu Emerjénsia hodi taka dalan ba moras ne’e labele tama ita-nia rai,” Xefe Governu dehan hafoin enkontru ho Xefe Estadu iha Palásiu Prezidensiál, kinta ne’e.

Notísia Relevante: Governu propoin estende EE ba daualu

Aleinde ne’e, pandemia globál nia númeru afetadu iha mundu sa’e maka’as, liuliu nasaun viziñu sira.

“Ita-nia esperiénsia ho nasaun sira seluk la hanesan, tanba sira halo Estadu Emerjénsia tanba moras ne’e da’et ona iha komunidade, maibé ita halo atu taka dalan hodi moras ne’e labele tama ita-nia rai,” nia akresenta.

Nune’e, PM Taur dehan medida no regra EE daualu sei nafatin ho aplikasaun ne’ebé iha fleksibilidade no atividade hotu la’o tuir prátika situasaun surtu COVID-19 iha Timor-Leste.

Estensaun EE tanba haree ba mudansa preokupante husi situasaun epidemiolójika no proliferasaun ba kazu rejistadu no kontájiu COVID-19 iha nível rejionál no mós mundiál, atu evita no netraliza risku propagasaun no bele proteje saúde públika no iha kbiit atu hatán ba Sistema Nasionál Saúde.

EE dahitu hahú husi tuku 00:00 loron 04 novembru 2020 (kuarta) no ramata iha tuku 23:59 loron 03 dezembru 2020 (kinta).

 Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here