Komandante Jerál PNTL, Komisáriu Faustino da Costa. Imajen TATOLI/António Gonçalves

DILI, 26 novembru 2020 (TATOLI)—Relasiona ho kontratu entre Polísia Nasionál Timor-Leste (PNTL) ho operadór telekomunikasaun Telemor ba Closed Circuit Television (CCTV) ne’ebé monta iha Dili laran, Komandante Jerál Polísia Nasionál Timor-Leste (PNTL), Komisáriu Polísia Faustino da Costa, hateten administrativamente sei informa lala’ok ba Governu, maibé servisu ne’e kontinua funsiona hanesan baibain.

“Ita sei aprezenta filafali ba Governu atu deside, maibé operasaun CCTV sei la’o hela no nia administrasaun mak PNTL sei haree ho Governu,” Komisáriu Faustino da Costa, relara hafoin halo enkontru semanál ho Prezidente Repúblika, Francisco Guterres ‘Lú Olo’ iha Palásiu Prezidensiál, Bairro Pité, kinta ne’e.

Servisu Investigasaun Kriminál (SIC, sigla portugés) ezekuta mandadu buska, detensaun no apreensaun hosi Tribuál Distritál Dili (TDD) ba  aktuál Prezidente Autoridade Nasionál Komunikasaun (ANC, sigla portugés), João Oliveira Freitas, tanba diskonfia iha relasaun ho ligasaun internet ilegál, ne’ebé durante ne’e komete hosi Telemor no kompañia Elite Computer.

“Mandadu hasoru Autoridade ANC ne’e la’ós Komandu Jerál mak orienta, maibé  tanba ezekuta mandadu kapturasaun hosi Tribunál,” Komisáriu Faustino realsa.

Tuir dokumentu ne’ebé sai baze ba SIC hodi halo detensaun ba Prezidente ANC ne’e tanba deskonfia halo koordenasaun servisu ho suspeitu jestór prinsipál Elite Computer ho inisiál MS no Suspeitu Jestór prinsipál Telemor ho inisiál TVB, hodi halo fornesementu internet ilegál, ne’ebé foti hosi rede indonézia ba insitutisaun Governu Timor-Leste, inklui Komandu Jerál PNTL.

“Ein prinsípiu, ha’u labele esplika detallu, maibé prosesu investigasuan la’o hela, ne’ebé PNTL mós hatene katak bele iha impakatu ruma la’ós ba ami de’it maibé dala ruma ba konsumidór hotu, maibé ita hein katak prosesu hotu sei la’o di’ak atu iha solusaun,” nia akresenta.

Governu liuhosi Ministériu Interór no Ekipa Legál hosi Gabinete Primeiru Ministru hahú halo verifikasaun ba dívida PNTL  iha operadór Telemor, hamutuk  $200.000 to’o $500.000  ne’ebé  seidauk selu ba Telemor.

Divída 2012 to’o 2017, PNTL la halo kontratu ho operadór telekomunikasaun virnam ne’e, maibé halo de’it memoradum entedimentu ne’ebé presiza haree legálidade hafoin halo pagamentu.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here