Diretor Jeral MSSI, Rui Manuel Gago Exposto

DILI, 26 novembru 2020 (TATOLI)—Ministériu Solidaridade Sosiál no Inkluzaun (MSSI) sei kontinua asegura implementasaun rejime jurídiku Instituisaun Solidaridade Sosiál (ISS) no Instituisaun Públiku sira maibé la ho fin lukrutivu. Nia dehan, Prosesu avaliasaun no define orsamentu ba ISS iha ámbitu OJE 2020 la hanesan ho tinan hirak liuba.

Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten aprovasaun rejime jurídiku ba instituisaun solidariedade sosiál (dekretu lei nú 25/2017) loron 26 jullu fó mandatu no responsabilidade ba MSSI hodi nafatin asegura funsionamentu Institusaun Solidariedade Sosiál (ISS) tuir kompeténsia no área servisu instituisaun nian.

“MSSI sei kontinua asegura implementasaun rejime jurídiku Instituisaun Solidaridade Sosiál (ISS) no Instituisaun Públiku sira maibé la ho fin lukrutivu. Tanba prosesu avaliasaun no define orsamentu ba ISS iha ámbitu OJE 2020 la hanesan ho tinan hirak liuba,” Diretór Jerál MSSI, Rui Manuel Gago Exposto, hato’o ninia intervensaun bainhira partisipa iha  serimónia asina akordu kooperasaun entre MSSI ho ISS iha salaun MSSI, Caicoli, Dili, kinta ne’e.

Tanba, nia dehan, ho tempu ne’ebé limitadu, nune’e la halo debate direta ho ISS sira kona-ba proposta ne’ebé aprezenta. Maske mune’e, prosesu avaliasaun ne’ebe organiza hosi ekipa téknika no akompaña hosi observadór independente sira, la’o di’ak tebes.

Nia dehan, verifikasaun finál ba alokasaun orsamentu kada ISS hetan prezensa hosi ISS rasik no kankorda ho totál orsamentu ne’ebé aprova ba kada ISS. Tinan ida-ne’e, MSSI realiza akordu kooperasaun ho Instituisatun Solidaridade Sosiál hamutuk 28 ho totál orsamentu ne’ebé mak MSSI apoia durante DOT hamutuk $691,564.60.

“Totál orsamentu jerál ne’ebé MSSI sei halo transferénsia ba ISS iha 2020 hamutuk  $1,387.009,64  ne’ebé akumula hosi Dotasaun Orsamentál Temporária (DOT) hamutuk $691,564,60 no aumenta OJE 2020 hamutuk $695,445,04,” Diretór jerál MSSI ne’e hateten.

Aleinde ida-ne’e, nia hateten, kobre mós nesesidade instituisaun tomak inklui nesesidade fundamentu benefisiáriu nian, fulan balun iha tempu DOT nian ne’ebé mak la konsege halo transferénsia, saláriu désimu terseiru no taxa seguransa sosiál.

Nia hateten, susesu ne’ebé mak durante ne’e ISS hala’o iha tinan lima nia-laran (2014-2019) no liuliu 2019 hanesan referénsia ba implementasaun programa no ezekusaun orsamentu 2020.

Nia relata, área unidade sosiál iha Uma Mahon ho totál benefisiáriu na’in-3.977, kompostu hosi 2014-2019 hamutuk na’in-3.241 no 2020 hamutuk na’in-736 ba vítima feto no labarik feto. Defsiénsia nian hamutuk na’in-7.229, kompostu hosi ema ho defisiénsia na’in-6.573 iha 2014-2019 no 2020 hamutuk na’in-656.

Orfonatu nian, nia informa, hamutuk na’in-1.441 kompostu hosi 1.197 nian ba labarik orfonatu iha tinan 2014-2019 no tinan 2020 labarik orfonatu hamutuk na’in-244. Sentru Komunitária hamutuk 17.748 ne’ebé kompostu hosi 15.043 ba labarik no foinsa’e inklui idozu vulnerável, iha tinan 2014-2019 no 2020 hamutuk 2.705. Ba ONG sira ho karáter prevensaun no promosaun kbiit ema no família kbiit laek sira iha tinan 2014-2019, benefiáriu hamutuk 4.756 no 2002 hamutuk 909.

Tanba ne’e, nia esplika, Konstituisaun RDTL artigu 56 hateten katak responsabilidade ba Estadu kona-ba presta asisténsia sosiál ba sidadaun hotu liuhosi apoiu no halo fiskalizasaun, ne’ebé mak haktuir lei ba atividade no funsionamentu Instituisaun Solidariedade Sosiál (ISS) no instituinaun hirak seluk ne’ebé rekoñese katak laiha interese públiku maibé la hó fin lukrutivu.

Knaar MSSI, nia esplika, ne’ebé mak kontempla ona iha Planu Estratéjiku MSSI mak fó protesaun sosiál ba sidadaun hotu. Kooperasaun servisu ho ISS hanesan parte hosi pilár servisu sosiál nian ne’ebé konsidera sai hanesan entidade parseria sira-ne’ebé Estadu fó apoiu atu fó komplementa Estadu nia responsabilidade.

Apoiu ida-ne’e, nia esplika, atu fó protesaun sosiál ba sidadaun sira iha área defisiénsia nian hanesan ba Uma Mahon, Sentru Komunitária (atividade tempu livre ba labarik sira, foin’sae sira no idozu vulnerável), Orfonutu no ONG sira ho karáter prevensaun no promosatun kbiit ema no familia kbiit laek sira. Sira reforsa ekonómia vítima sira no benefisiáriu programa balun MSSI nian no implementa relatóriu CAVR “Chega!”.

Jornalista: Osória Marques

Editór: Cancio Ximenes

  

PUBLISIDADEiklan

HAKEREK NO HATÁN

Please enter your comment!
Please enter your name here