Logotipu MEJD

DILI, 26 novembru 2020 (TATOLI)—Ministériu Edukasaun Juventude no Desportu (MEJD) liuhosi Unidade Kuríkulu Nasionál, kinta ne’e, rejeita informasaun falsu ka “hoax” ne’ebé espalla iha media sosiál facebook katak estudante finalista 3.417 maka la pasa iha ezame nasionál  (EN) tanba fallansu tékniku husi MEJD nian, ne’e laloos no falsu.

Koordenadór Unidade Kurikúlu Nasional (UKN), Pedro Gonçalves, hateten ekipa Ministériu Edukasaun Juventude no Desportu daudaun ne’e iha hela prosesu koresaun materia ezame nasionál.

Notísia Relevante:Governu sei halo abertura ba ezame nasionál iha Dili no Ermera

“Bazeia ba informasaun hoax ne’ebé mak espalla ona ba públiku, Unidade Kuríkulu Nasionál ne’ebé hamahan an iha Ministériu nia iha responsabilidade tomak ba realizasaun ezame nasional hakarak klarifika katak informasaun ne’ebé fó sai iha media sosiál facebook ne’e laloos no falsu,” nia informa ba jornalista sira durante konferénsia imprensa iha MEJD Vila-Verde Dili, ohin.

Nia informa Ministru Edukasaun Juventude no Desportu, Armindo Maia, foin maka halo abertura ba prosesu ezame nasionál iha loron 24 fulan-novembru 2020 no sei ramata iha loron 13 fulan-dezembru 2020.

“Rezultadu husi koresaun pontu ezame nasionál ne’e sei fó sai iha loron 18 fulan-dezembro 2020. Ne’e duni informasaun ne’ebé mosu iha media sosiál kontrariu ho data ne’ebé previstu ona,”nia dehan.

Ekipa koresaun materia ezame nasionál ne’e maihosi Unidade Kuríkulu Nasionál (UKN), Reprezentante Gabinete Ministru no Vise Ministru, Inspesaun Jerál MEJD para bele garante transparansia no konfidensialidade ligadu ho valór estudante finalista sira-nian.

Ministériu Edukasaun Juventude no Desportu (MEJD) husu ba Polisia Servisu Investigasaun Kriminal (PSIC-sigla portugés), atu deteta autór ne’ebé espalla informasaun hoax ba públiku kona-ba estudante finalista 3.417 la pasa iha ezame nasionál fallansu tékniku husi MEJD.

“Ministru orienta ona atu hato’o informasaun ba PSIK atu foti medida ruma ba aktu ne’ebé mak ita-nia maun alin balun lansa iha media sosiál nia iha aktu legál ruma ka lae, tanba ita-nia Ministru konsidera ne’e hanesan alegasaun ida,” nia hateten.

Entretantu, tuir dadus husi MEJD relata estudante finalista hamutuk 55.072, maka tuir ezame iha tinan 2020 kompostu husi ensinu báziku 30.359, ensinu sekundária jerál 20.145, husi siénsia teknolojia 10.365, siénsia sosiál no umanidade 9.780.

Enkuantu, estudante finalista husi ensinu sekundária tékniku vokasionál hamutuk 4.568, kompostu husi área tékniku 1.462, ekonomia komérsiu 1.501, otelária  komérsiu 568, agrikultura no peska hamutuk 1.037.

Estudante finalista 55.072 rejista husi eskola 444, eskola ensinu báziku 292, ensinu sekundária Jerál 96 no ensinu sekundáriu tékniku vokasionál 56.

Notísia Relevante:MEJD enkoraja estudante sira hakaas-an iha ezame nasionál

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here