Futebolista lendáriu, Diego Maradona. Imajen/foti hosi Google

DILI, 26 novembru 2020 (TATOLI) – Futebolista lendáriu, Diego Maradona, kuarta kalan (25/11), iha nia rezidénsia iha Argentina, hakotu-iis no fila hikas ona ba Aman Maromak Nia Kadunan Santu.

Jogadór ekipa nasionál Argentina ne’ebé susesu lori Argentina manan trophy kopa mundiál 1986, mate tanba sofre moras komplikasaun hodi prejudika nia fuan.

Diego Maradona. Imajen/foti hosi Google

Diego Maradona, koñesidu iha mundu bola nian golu “si tangan tuhan (a mão de deus)” ka “liman-maromak” ne’e fila ba Maromak lori tristeza boot ba bola mania-sira iha mundu, inklui Timor-Leste.

Diego Mardona nia karreira aas liu iha mundu internasionál iha kopa mundiál  1986 ho hamosu nia estilu ikóniku golu liman-maromak (gol tangan tuhan).

Iha fatin-fatin no iha kampu-sira bola nian, joven-sira tuur hamutuk liu ema na’in tolu ko’alia mak  Maradona nia mate. Hosi idade juventude to’o adultu-sira ko’alia Maradona hodi hanoin hikas Maradona nia jogu no Maradona nia maneira, tátika no abilidade iha kampu laran hodi kedok bola kabuar iha nia tempu no nia glória.

Maradona, la’ós lendáriu iha mundu futeból de’it, maibé liuhosi mundu futeból, nia sai hanesan mós embaixadór estra-ordináriu ne’ebé lori bola hosi kampu-laran tama to’o igreja-laran no lori bola tama to’o Bazílika São Pedro, hodi entrega nia-farda ho númeru kamizola (10) no bola ba Papa João Paulo II.

Diego Maradona. Imajen/foti hosi Google

Maradona nia mate la’ós lori triste no lutu de’it ba povu no juventude-sira Argentina nian no la’ós de’it triste ba sira ne’ebé horik iha rai Amerika Latina-sira. Maibé, Timoroan barak mós sente. Nune’e, Federasaun Futeból Timor-Leste (FFTL) liuhosi Adjuntu Sekretáriu Jerál, Frederico Martins, hato’o sentidu kondolénsia ba eis jogadór selesaun nasionál Argentina  ne’e nia mate.

“Maradona, a true icon, a legend of the game. Mundu futeból lakon jogadór lendáriu no karizma. Mundu futeból sei la haluha Maradona nia obra,” Frederico   Martins hateten bainhira dada-lia ho Agência Tatoli iha edifísiu FFTL, Dili.

Iha inísiu novembru, tinan ne’e, Maradona  evakua urjente ba ospitál. Bainhira hala’o tiha konsulta saúde iha Klínika Olivos, Ipensa Sanatorium, iha La Plata, Argentina, Maradona tenke halo operasaun iha tersa (3/11).

Tuir rezultadu CT scan deskobre Maradona iha sintoma hematoma subdural. Hematoma subdural maka akumulasaun ran iha kakutak leten. Ne’e bele akontese bainhira hetan pankada maka’as iha futar ulun.

Operasaun ba Maradona nia moras la’o ho di’ak. Nune’e, iha loron 11 novembru, tuku 18.00 oras Argentina, autoridade ka médiku-sira autoriza Maradona bele fila ba uma. Hosi ne’ebá kedas la iha tan novidade ruma kona-ba Maradona nia kondisaun saúde to’o derrepente de’it mosu novidade triste katak Maradona laiha ona.

Hanesan omenajen ba Diego Maradona nia mate, Governu Argentina deklara loron tolu “lutu” nasionál. Prezidente Argentina, Alberto Fernandez, mós tau kedas nia imajen hamutuk ho Maradona.

“O lori ami ba fatin ne’ebé aas iha mundu. O halo ami ksolok no kontente. O mak ida ne’ebé di’ak liu hosi ema hotu. Obrigadu ba prezensa, Diego. Ami sempre saudades o iha ami nia moris tomak,” prezidente Argentina, Alberto Fernandez hakerek ne’ebé sita iha mídia Argentina Clarin. Adeus Diego Maradona!

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here