Diretór Ezekutivu Fundasaun Klibur Domin, Joaquin Freitas Soares. Imajen/Nelson de Sousa

DILI, 26 novembru 2020 (TATOLI)—Diretór Ezekutivu Fundasaun Klibur Domin Tibar Munisípiu Liquiça, Joaquim Freitas Soares, informa husi fulan-janeiru to’o setembru 2020 ne’e halo ona tratamentu ba pasiente ho kazu tubercoluse ka TBC hamutuk 230 maihosi Munisípiu 12 inklui Rejiaun Administrativa Espesiál Oe-Cusse Ambeno (RAEOA).

”Pasiente ne’ebé mak halo tratamentu ativu iha Klibur Domin hamutuk 32, kapasidade ami bele akomoda to’o pasiente 80,” dehan nia ba jornalista sira iha Caicoli, Dili, kinta ne’e.

Notísia Relevante:Global Fund Fó Apoiu Fundu Globál $15.7 Millaun Ba Programa TBC

Nia deklara Klínika ne’e defende diretu sidadaun sira atu asesu saúde ho kualidade liliu prevensaun no kombate ba moras oioin inklui TBC iha Timor-Leste.

”Tinan ne’e ha’u seidauk relembra numeru ezatu maibé husi janeiru to’o setembru 2020 kazu ne’ebé mak iha hamutuk 230 kazu ba moras tubercoluse mak ita detekta no fó tratamentu,” tenik tan.

Klínika Klibur Domin Tibar maka oras ne’e sai promotór ba programa saúde iha família ne’ebé maka implementa iha Munisípiu Baucau.

“Ami nia ekipa iha hela Munisípiu Baucau iha Postu Administrativu Kelikai, Laga, Baguia, Vemase, Venilale no Baucau Vila para servisu hamutuk ho Autoridade Lokál sai promotor saúde família oinsá atu tau forsa hamutuk ho Sentru Saúde no Postu Saúde para halo deteksaun kazu ativu signifika ita ba tama sai uma para buka ema moras TBC halo diagnóstika no mós halo tratamentu ba sira,” nia hateten.

Aleinde ne’e, Munisípiu parte leste ne’e sei kobre mós Munisípiu Liquiça, Bobonaro, Ermera no iha tinan 2021 sei kontinua implementa mós iha Munisípiu Viqueque.

Ezekutivu ne’e dehan, programa ne’e hetan finasiamentu husi Fundu Globál ne’ebé mak oferese liuhosi Ministériu Saúde.

“Ami fó konfiansa nafatin atu sai parseiru importante ba Minsitériu Saúde para ita bele elimina moras TBC iha tinan 2030 bazeia ba objetivu dezenvolvimentu sustentavél ne’ebé mak ita-nia Estadu adopta ona husi Estadus Unidus nian,” katak nia.

Atu kombate moras hada’et ne’e iha Timor-Leste, presiza sensibiliza informasaun kona-ba moras TBC, sintoma no meius prevensaun sira ba kada uma-kain sira iha rai laran.

“Moras ne’e da’et ema ida ba ema seluk ezemplu tinan ida ema ida moras TBC mak la halo tratamentu entaun tinan ida da’et ba ema na’in 10 too 15 entaun ida ne’e problema boot tanba ne’e da’et tutan ba família uma laran,”nia hateten.

Entretantu, pasiente TBC ne’e maka halo tratamentu saúde no hemu ai-moruk rutina durante fulan neen to’o fulan 18.

Notísia Relevante:PR Husu Atu Kombate TBC Tenke Ho Transversál

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here