Estudante sira halo apresentasaun iha eskola EBC 30 Agostu Komoro hodi komemora loron mundial siensia matematika, Kinta 26 Novembru 2020.Imajen Tatoli/Antonio Goncalves

DILI, 26 novembru 2020 (TATOLI)—Estudante Eskola Ensinu Sekundária Jerál Olokasa Munisípiu Viqueque aprezenta matéria rua kona-ba ezamisaun ba plantas no sistema kurativu ventoza durante kompetisaun hodi komemora loron mundiál siénsia no matemátika ne’ebé hala’o iha Eskola Ensinu Báziku 30 Agostu Comoro Dili, kinta ne’e.

Koordenadora Grupu Estudante ESJ Olokasa, Aida Amaral da Costa, dehan sistema kurativu ventoza ne’e ligadu ba saúde umana hodi taka kopu ba ema-nia isin kulit atu supa ran maten no hasai veneno.

Notísia Relevante :Estudante São Pedro prodúz ai-moruk halo filtrasaun bee fo’er

“Molok ami mai halo aprezentasaun iha kompetisaun ne’e ami haree katak sistema kurativu ventoza ne’e serve duni atu aprezenta iha kompetisaun ne’e,” dehan nia ba Tatoli, kinta ne’e, iha Comoro.

Materia ne’ebé uza hodi halo kurativu ventoza ne’e maka uza osan besi falun ho suratahan, minarai no kopu.

“Maneira atu halo mak osan moeda bobar tiha ho suratahan halo naruk depois mak hoban oituan ho minarai depois sunu halo lakan tiha tiding iha ema nia kulit ne’ebé moras hafoin taka ho kopu,” nia esplika.

Iha parte seluk profesór disiplina Biolojia, Nemensio Sequeira Freitas, hateten metódu kurativu ventoza ne’e tuir médiku sira konsidera bele kura moras hipertensaun, anemia no seluktan.

“Reseita ida ne’e hatudu husi prátika ne’ebé iha katak kuandu ema nia kulit ka isin ne’ebé bubu iha kopu laran ne’e tanba ran maten orsida sei naben tiha tanba manas iha kopu laran ne’e mak sunu. Ho nune’e mak sirkulasaun ran ne’e bele la’o normal fali,” nia informa.

Notísia Relevante :Japaun husu TL dezenvolve maka’as iha siénsia matemátika

Jornalista : Tomé Amado

Editór:Agapito dos Santos

HAKEREK NO HATÁN

Please enter your comment!
Please enter your name here