Diretór Jerál STAE, Acilino Manuel Branco

DILI, 26 novembru 2020 (TATOLI)—Diretór Jerál Sekretariadu Téknika Administrasaun Eleitorál (STAE), Acilino Manuel Branco, hateten iha fulan dezembru nia klaran, Sekretariadu Tékniku Administrasaun Eleitorál (STAE) sei suspende provizóriu atendementu kartaun eleitorál.

Notísia Relevante: 2021, tinan preparativu ba eleisaun

“Ita-nia atendementu ba públiku to’o de’it iha fulan dezembru nia klaran. Tanba ne’e mak informa ba públiku katak iha tempu badak, ita sei suspende provizóriu atendementu kartaun eleitorál. Tanba depois ne’e, ita sei rekolla ekipamentu hirak ne’ebé mak ita utiliza ba iha resensiamentu para halo sinkronizasaun hodi bele rekolla dadus hotu. Ne’e STAE rejistu, durante tinan ida nia-laran ba públiku,” Diretór Jerál Sekretariadu Téknika Administrasaun Eleitorál (STAE), Acilino Manuel Branco, ba jornalista sira iha Otél Novu Turizmu, kinta ne’e.

Nia hateten, sei iha tempu ne’ebé sufisiente STAE halo preparasaun no halo manutensuan ba ekipamentu sira, nune’e inísiu tinan 2021 ne’e STAE tenke halo atendementu normál fali ona.

Diretór STAE ne’e husu ba sidadaun sira iha territóriu Timor-Leste tomak atu hakbesik-aan ba eskritóriu STAE nian ne’ebé mak iha kada munisípiu 12 inklui RAEOA nian, nune’e bele halo resesiamentu ka atualiza kartaun eleitorál.

Tanba, nia informa, semana oin ka meadu dezembru sei suspende atendementu provizóriu kartaun eleitorál no inísiu tinan 2021 mak fó atendementu fali ba públiku.

“Tuir dadus ne’ebé mak STAE prodús iha semana kotuk ne’e purvolta 825.300-resin. Númeru ne’e seidauk serteza tanba ita asesu sistema ne’ebé mak off line tanba ne’e mak iha sei suspende para rekolla hotu mak informa dala ida ba  públiku,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here