Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 25 novembru (TATOLI)-Situasaun seguransa iha territóriu nasionál la’o hakmatek. Maske nune’e, Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál   Lere Anan Timur, husu ba entidade hotu-hotu atu kontinua presta ida-idak nia responsabilidade hodi kontribui garante paz no prosperidade ba povu ida-ne’e.

Majór Jenerál   Lere Anan Timur afirma lia-hirak ne’e ba jornalista-sira iha Palásiu Prezidensiál, ohin,  hafoin halo enkontru semanál ho Prezidente Repúblika, Francisco Guterres “Lú-Olo”.

Enkontru ho Komandante Supremu forsa armada ne’e akompaña mós hosi Xefe Estadu Maiór F-FDTL, Brigadeiru Falur Rate Laek no Xefe Estadu Maiór, Koronél Calisto Santos Coli “Coliati”.

“Hanesan enkontru baibain hodi informa servisu forsa armada nian no  situasaun seguransa iha nivel nasionál la’o hakmatek,” Lere Anan Timur hateten.

Liuhosi enkontru ne’e, Xefe Estadu Maiór F-FDTL, Majór Jenerál Lere Anan Timur, aprezenta mós forsa armada nia preokupasaun balun, liuliu liga ho prezensa Governu nian iha baze ne’ebé tuir sira-nia haree seidauk másima.

Nia hateten, ko’alia kona-ba estabilidade nasionál tenke mai hosi baze, katak xefe suku, xefe aldeia tenke kontrola nia suku ho aldeia-sira.

“Ate agora ha’u haree xefe suku nivel nasionál, la’ós hotu-hotu, maibé balun laiha responsabilidade,” tenik Lere Anan Timur.

Nia fó ezemplu iha servisu ierarkia militár nian, kada semana, nia hanesan Xefe Estadu Maiór F-FDTL sempre presta responsabilidade hosi komandante komponente-sira kona-ba sira-nia responsabilidade ho baze Estadu nia interese.

“Ha’u fiar Prezidente Repúblika no Primeiru-Ministru nu’udar veteranu no apoiu hosi ami  tomak, hakarak mak  halo  Timor-Leste la’o tuir dalan loos ba  prósperu no iha estabilidade nasionál,” Lere Anan Timur hateten.

Jornalista   : Nelson de Sousa  

Editór        : Francisco Simões    

HAKEREK NO HATÁN

Please enter your comment!
Please enter your name here