DILI, 25 novembru (TATOLI) – Komisáriu Komisaun Anti-Korrupsaun (CAC), Sergio Hornai, apela ba kargu xefia-sira iha instituisaun Estadu atu prepara-aan deklara rikusoin.
Notísia Relevante : CAC halo sensibilizasaun lei MPCC hahú hosi SEFOPE
Obrigasaun ida-ne’e hodi kumprimenta ba Lei númeru 7/2020, kona-ba Medida Prevensaun no Kombate Korrupsaun (MPPC) ne’ebé prevee iha kapítulu II Regime de Declaracão de Rendimentos, Bens e Interesses hosi artigu 27 to’o ba iha artigu 58.
Liuhosi kontinuasaun atividade diseminasaun ba Lei MPCC ba funsionáriu-sira hosi Ministériu Solidariedade Sosiál no Inkluzaun (MSSI), ohin, iha salaun MSSI, Caicoli, Dili, Komisáriu Sergio Hornai, esklarese, lei MPCC hetan ona promulgasaun hosi Prezidente Repúblika, Francisco Guterres “Lú-Olo” iha fulan agostu liubá hodi fó biban ba timoroan atu respeita ninian dignidade nu’udar ema ho abilidade di’ak iha servisu fatin serve povu no nasaun Timor-Leste hodi evita-aan monu ba iha tentasaun krime korrupsaun.
Sergio Hornai afirma, funsionáriu públiku-sira ho koezaun ida bele hametin instituisaun públiku sai di’ak liu tan iha servisu ho transparente, kontabilidade, onestidade no responsabilidade.
Diresaun Prevensaun Korrupsaun EAK sei hala’o diseminasaun lei MPCC hanesan iha territóriu nasionál molok implementa iha fevereiru 2021.
“Sorumutuk ida-ne’e ita tulun malu hodi alerta ba malu ba medida mak ita servidór Estadu atu halo iha tempu badak hafoin Lei MPCC ne’e entrada ein vigor iha loron 27 fevereiru 2021,” Sergio Hornai hateten.
Diretór Prevensaun no Sensibilizasaun, Rosario de Araujo Salsinha hateten, objetivu hosi diseminasaun ne’e atu reunifika timoroan-sira, liu-liu funsionáriu públiku ne’ebé haknaar-aan iha MSSI ho hanoin atu kontribui ba iha Lei foun MPCC.
Jornalista : Nelson de Sousa
Editór : Francisco Simões
