DILI, 25 novembru 2020 (TATOLI)—Rede Feto Timor-Leste hamutuk ho organizasaun feto sira seluk, ohin, halo kampaña loron 16 hodi kontra violénsia hasoru feto no labarik-feto sira iha Timor-Leste ho tema “Hapara Violénsia, Respeita Direitu Umanu no Respeita Ema-Nia Liberdade”.
Prezidente Rede Feto, Yasinta Luzinha, hatutan situasaun Timor-Leste ohin loron nakonu ho violénsia ne’ebé hasai ema-nia vida no hakanek ema seluk hodi fó impaktu ba sosiedade nia moris ne’ebé la hakmatek. Tanba ne’e, nia dehan, Rede Feto konsidera violénsia nu’udar aktu krime ne’ebé la lori individu no povu Timor-Leste ba dezenvolvimentu.
“Violénsia nu’udar aktu ne’ebé hamate ema-nia direitu atu moris iha pás no liberdade iha nia rain rasik. Rede Feto konsidera violénsia nu’udar aktu krime ne’ebé la lori individu no povu Timor-Leste ba dezenvolvimentu. Rede Feto preokupa ho jerasaun tuir mai ne’ebé presiza tebes atu iha ezemplu ka referénsia di’ak atu lori jerasaun tuir mai sai ema ne’ebé domin na’in, responsável no autór ba dame hodi lori rai Timor-Leste ba dezenvolvimentu sustentável,” Prezidente Rede Feto, Yasinta Luzinha, hateten iha Tasi Tolu, Dili, kuarta ne’e.
Rede Feto kondena tebes aktu hirak ne’e no la tolera atu iha tan violénsia hasoru feto no labarik-feto no grupu vulneravél sira. Tanba ne’e, ohin (25 novembru 2020), nu’udar loron dahuluk ba kampaña hapara violénsia kontra feto no sei kontinua ho atividade diferensa durante loron 16 no termina iha loron 10 dezembru 2020.
Rede Feto Timor-Leste hala’o Atividade Loron 16 Ativizmu Kontra Violénsia Bazea ba Jéneru (VBJ), hahú hosi loron 25 novembru 2020 ho la’o ain ne’ebé mak partisipa hosi estudante univesitáriu no organizasaun joventude sira.
“Objetivu hosi la’o ain ne’e hanesan kampaña ida atu bolu atensaun ba públiku hodi hamriik defende direitu feto vulneravél, ema ho defisiénsia sira no Lesbian-Bisexual-Gay-Transjender no Inter-seksu (LGBTI) tanba sira ne’e mak sempre sai alvu ba violénsia,” nia dehan.
Tanba ne’e, nia hateten, ema hotu simu responsabilidade hodi proteje sira-nia hela fatin no asegura atu la akontese violénsia kontra feto no labarik-feto no kampaña ida-ne’e mós hanesan oportunidade bolu públiku hodi hamutuk respeita direitu no liberdade ema ida-idak nian, promove dame no armónia iha sosiedade.
Atividade la’o ain ba loron 16 ne’e partispa hosi Organizasaun Feto, Organizasaun Internasional no nasionál, feto no mane ativista, joven hosi suku, lider lokál, relijiaozu, ema ho defisiénsia no komunidade iha Comoro.
Notísia Relevante: Rede Feto hakarak reforsa partisipasaun feto iha dezenvolvimentu nasaun
Jornalista: Osória Marques
Editór: Cancio Ximenes
