Labarik sira halimar hela iha bero leten, iha tasi ibun Bidau Santana, domingu (29/03). Imajen TATOLI/António Gonçalves

DILI, 25 novembru 2020 (TATOLI)–Liuhosi reuniaun Konsellu Ministru (KM), membru Governu sira aprova ona ho alterasaun, projetu dekretu-lei ba kriasaun Institutu Nasionál Direitu Labarik, Institutu Públiku (INDL, I.P).

“Aprova ona ho alterasaun atu kria Institutu Nasionál Direitu Labarik no aprova ninia estatutu sira,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM iha Palásiu Governu, kuarta ne’e.

Dekretu-lei ne’e aprezenta husi Vise-Primeiru Ministru no Ministra Solidariedade Sosiál no Inkluzaun, Armanda Berta dos Santos.

“Institutu públiku ne’e susede iha direitu, obrigasaun no patrimóniu sira hotu ba Komisaun Nasionál Direitu Labarik no niniaa misaun mak kontribui ba promosaun, defeza, salvaguarda no halo akompañamentu direitu labarik sira,” Portavós Governu ne’e akresenta.

Tuir Ministru, antes mós iha tiha ona Komisaun Nasionál Dereitu Labarik, maibé daudaun transforma ba institutu públiku atu garante liután kontrolu ezekutivu ne’ebé di’ak liu.

Nune’e mós, atubele responde ho lalais bainhira iha kazu ruma relasiona ho direitu labarik no Governu ladún bele responde lalais ba orientasaun diretiva ne’ebé maka ezekutivu rasik hakarak atu fó, atu nune’e bele avansa ho lalais ba ita-nia polítika sira relasiona ho protesaun direitu labarik sira iha Timor-Leste.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here