Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (25/11). Imajen TATOLI/Egas Cristovão

DILI, 25 novembru 2020 (TATOLI)—Governu liuhosi reuniaun Konsellu Ministru (KM) halo aprovasaun ba projetu deliberasaun kona-ba promosaun patente alta militár nian.

“Projetu deliberasaun ne’ebé aprezenta husi Ministru Defeza, Filomeno da Paixão de Jesus ne’e aprovadu iha reuniaun Konsellu Ministru,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun KM iha Palásiu Governu, kuarta ne’e.

Portavóz Governu ne’e esplika, hafoin aprova diploma ne’e, ezekutivu sira sei propoin ba Prezidente Repúblika, tuir Estatutu foun Militár FALINTIL-Forsa Defeza Timor-Leste (F-FDTL).

Governu delibera hodi propoin ba Prezidente Repúblika hodi promove Majór-jenerál Lere Anan Timur ba Tanente-Jenerál, Brigadeiru-Jenerál Domingos Raúl ‘Falur Rate Laek’ ba Majór-Jenerál, Koronel Calisto dos Santos Coli ‘Coliati’ ba Brigadeiru-Jenerál no Capitão de mar e guerra, Donaciano da Costa Gomes ‘Pedro Klamar Fuik’ ba Komodoru.

“Atu esklarese klaru liután katak forsa defeza ne’e hanesan forsa ne’ebé relativamente foun maibé profisionaliza bebeik husi loron ida ba loron seluk. Promosaun sira hanesan ne’e konstitui ita-nia esforsu atu hadiak liután ita nia forsa defeza, tanba ierarkia militár relasiona ho promosaun sira iha relasaun direta ho ita-nia númeru forsa sira rasik, ezemplu devizaun hira mak ita iha entaun ninia lideransa ne’e rasik husi kompozisaun forsa militár ne’ebé iha,” governante ne’e esklarese.

Nia subliña, Ministru Defeza iha planu atu avansa ho rekrutamentu no amenta divizaun, tanba ne’e maka hahú agora dudu ona sira ne’ebé mak iha topu ierarkia atubele sa’e tán

“Atu nune’e sira mós bele ko’alia ho paíz sira seluk tanba iha militár ne’e, bainhira xefe maiór ida maka ho deviza koronel, susar tebes atu tur hamutuk iha meza ida atu diskute ho parseiru nasaun seluk ne’ebé dala barak jenerál,” nia akresenta.

Enkuantu seremónia ba promosaun realiza bainhira publika ona projetu deliberasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here