Reitor UNTL,Franscisco Miguel Martins tula hela beo ba estudante enfermajen UNTL. Imajen/Espesial.

DILI,25 novembru 2020 (TATOLI)—Estudante Enfermajen Fakuldade Medisina Siénsia Saúde Universidade Nasionál Timor Lorosa’e (UNTL), hamutuk ema na’in 394, kuarta ne’e, halo juramentu profesionál hodi serbí pasiente sira bainhira destaka iha postu saúde, sentru saúde, ospitál referál, nasionál no klínika privada sira.

Sira halo juramentu ne’e iha ámbitu programa Capping Day no Florence Nighttingale ne’ebé hala’o iha salaun Igreja Katedrál Vila-Verde Dili.

Notísia Relevante :Estudante Enfermajen UNTL Prátika Iha HNGV

Dekanu Fakuldade Medisina Siénsia Saúde UNTL, José Deonísio Ximenes, hateten juramentu ne’e atu serbí no povu no nasaun.

”Ida ne’e hanesan juramentu ba faze dahuluk nian ne’ebé mak enfrenta iha moris nian hanesan estudante no futuru profisionál saúde hanesan enfermeiru no enfermeira ba rai ida ne’e, ita boot sira hamutuk 394 ne’ebé mak halo  juramentu ne’e la’ós jura halimar nian maibé jura hodi serbí no halo melloramentu sai futuru profisionál ne’ebé mak di’akliu hodi serbí povu,” nia hato’o apela ne’e durante ninia diskursu, ohin.

Nia dehan, tenki hatuur étika profesionál no responsabilidade servisu tuir saida maka jura ona hodi rai segredu  bainhira atende no fó asisténsia ba pasiente sira.

”Ha’u nia esperansa katak bainhira juramentu ne’e hotu atu hahú pratika ba fasilidade hotu-hotu iha teritóriu Timor laran tomak tenke hatudu responsabilidade dedika an atu serbí,” nia hateten.

Tuir planu estudante hirak ne’e sei halo prátika iha fasilidade saúde sira iha territoriu Timor-Leste. 

Iha fatin hanesan Reitór UNTL, Francisco Miguel Martins, hateten juramentu ne’e UNTL foin hala’o hahú iha tinan 2019 liubá.

Notísia Relevante :AETL Louva Servisu Enfermeiru Timoroan

Jornalista : Felicidade Ximenes

Editór :Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here