Primeiru-Ministru, Taur Matan Ruak partisipa iha seremónia lansamentu hatuur fatuk-inan ba konstrusaun edifísiu foun Tribunál Distritál Dili iha Caicoli, Dili, kuarta (25/11). Imajen Tatoli/Egas Cristovão

DILI, 25 novembru 2020 (TATOLI)- Konstrusaun edifísiu foun Tribunal Distritál Dili nian, ohin, hahú ona nia obra konstrusaun. Edifísiu ne’ebé lokaliza iha area Caicoli, iha Tribunal Rekursu (TR) ho Sentru Formasaun Jurídiku no Judisiáriu (CFJJ) nia klaran ne’e, konstrui ho medida andár-rua ho  nia valor projetu $10,990,769.35.

Notísia Relevante : PTR konvida Prezidente Repúblika hatuur fatuk-inan ba edifísiu foun TDD

Edifísiu foun TDD nian ne’e sei kompleta sala audiénsia julgamentu, sala ba servisu ofisiál justisa, juis, prokuradór, defensór, advogadu no sala de espera ba sidadaun sira ne’ebé asesu ba justisa ho espasu  dignu.

Lansamentu ba obra edifísiu TDD foun ne’e halo liuhosi serimónia hatuur fatuk-inan hosi reprezentante Prezidensia Repúblika liuhosi Xefe Kaza Sivíl, Francisco de Maria Vasconcelos, Prezidente Parlamentu Nasionál,  Aniceto Longuinhos Guterres, Primeiru-Ministru Taur Matan Ruak. Prezidente Tribunál Rekursu, Deolindo dos Santos, inklui konvidadu importante seluk tan.

Obra ne’e hetan supervizaun konsultóriu hosi kompañia  Dacrea In Association with  AEC no kontraktor hosi kompañia Xina Shadong International Economic and Technical Cooperation Group.R.P.

Tuir akordu kontratu entre obra na’in, Tribunál Rekursu ho kompañia exekutór  Xina Shadong International Economic and Technical Cooperation Group.R.P, katak durasaun obra ne’e sei termina iha tinan rua nia laran, hahú iha 2020 no sei entrega ba Estadu iha 2022.

Prezidente Tribunál Rekursu, Deolindo dos Santos. Imajen Tatoli /Egas Cristovão

Prezidente Tribunál Rekursu, Deolindo dos Santos, hateten, lansamentu  ne’e nu’udar loron istóriku ne’ebé importante tebes iha sentidu nesesidade atu asegura interese nasionál hodi garantia seguransa, paz no sosiál iha sosiedade nia leet.

Nia afirma, justisa ne’e iha nia instituisaun rasik ne’ebé kumpre nia misaun atribui hosi konstituisaun liuhosi ema lubuk ida nu’udar profisionál hodi hatudu sentidu justisa ba ema hotu atu bele asume justisa.

“Tribunál-sira asosia espasu ne’ebé mak Tribunál sira okupa  hodi transmite imajen soberania lejitimidade hodi ezerse justisa edifísiu transmite ba desizaun-sira ba seguransa jurídika kona-ba konfiansa kredibilidade juis, prokuradór, defensór no advogadu no ema-sira ne’ebé servisu iha Tribunál no mós sidadaun-sira ne’ebé sai utente ba Tribunál,” Deolindo dos Santos  hateten iha nia diskursu.

Nia hateten, presiza espasu ida dignu bele permite sai fatin reprezentativu no adekuadu ba sidadaun-sira atu buka justisa.

Deolindo dos Santos, dehan, harii Tribunál instánsia haat no aas liu mak Tribunál Rekursu no Tribunál-sira hotu-hotu ne’ebé mak iha agora daudaun funsiona hela iha fatin-sira uluk tempu Indonézia konstrui hela no edifísiu-sira ne’e aat ba beibeik ona.

“Dala barak juis, prokuradór, defensór-sira atu fó justisa ba sidadaun, maibé sira rasik mós dala barak hasoru difikuldade tanba espasu ne’ebé mak iha ezemplu ida mak ita hotu haree ho matan Tribunál Distritál Dili atuál,” nia hateten.

Nia lori Tribunál nia  naran hato’o agradesimentu espesiál  ba esforsu parte hotu Prezidente Repúblika, Primeiru-Ministru, Parlamentu Nasionál hodi apoiu tebes bele realiza konstrusaun ida-ne’e.

Xefe Kaza Sivíl Prezidénsia Repúblika, Francisco Maria de Vasconcelos. Imajen Tatoli/Egas Cristovão

Xefe Kaza Sivíl, Francisco de Maria Vasconcelos, ne’ebé lee mensajen Xefe Estadu nian, iha ámbitu lansamentu ne’e, katak konstrusaun edifísiu  foun ne’e sei ho espasu dignu  funsiona servisu nu’udar pasu importante ba institusionalizasaun justisa hanesan servisu públiku hosi parte Estadu nian hodi presta ba sidadaun.

Partisipa iha serimónia hatuur  fatuk inan ba edifísiu foun TDD nian ne’e Ministru Justisa, Manuel Cárceres da Costa, Ministru Obras Públika, Salvador Pires, Prokuradór Jerál Repúblika, José Ximenes, korpu diplomátiku, parseiru dezenvolvimentu, autoridade lokál no konvidadu-sira seluk tan.

Jornalista   : Nelson de Sousa

Editór         : Francisco Simões

HAKEREK NO HATÁN

Please enter your comment!
Please enter your name here