Bankada CNRT hala'o konferénsia imprensa kestiona Governu prevee tán orsamentu ba Ferry Haksolok. Imajen TATOLI/Evaristo Soares Martins.

DILI, 25 novembru 2020 (TATOLI)—Bankada Congresso Nacional da Recosntrução de Timorense (CNRT) la konkorda Governu prevee tán millaun $16,9 iha proposta Orsamentu Jerál Estadu (OJE) 2021 hodi finaliza Ferry Haksolok tanba iha hela prosesu investigasaun hosi Ministériu Públiku.

Notísia Relevante: RAEOA propoin millaun $127 inklui millaun $14 finaliza Ró Haksolok

“Bankada CNRT la konkorda ho desizaun hosi Governu nian atu hasai tán povu nia osan miliaun $16,9 hodi selu Ferry Haksolok  ne’ebé oras ne’e ferrujen tiha ona, inklui konstrusaun pontões atu ró atraka,” Reprezentante Bankada CNRT, Deputadu Ricardo Baptista, informa liuhosi konferénsia imprensa iha Bankada CNRT, iha Parlamentu Nasionál, kuarta ne’e.

Hosi millaun $16,9 ne’e, millaun $14 atu finaliza kontrusaun ba ró Haksolok no millaun $2.9 ba pontões atu atraka.

Bankada CNRT nota katak RAEOA-ZEESM sei iha saldo jerénsia millaun $177.4 ne’ebé autoridade subar ba Parlamentu Nasionál atu asesu paradeiru hosi osan ida-ne’e. Tanba-ne’e mak laiha fatin ba RAEOA atu husu tán osan ba Governu Sentrál.

Nune’e mós, tuir informasaun hosi Prokuradór Jerál Repúblika, José Ximenes iha mídia katak Ferry Haksolok iha hela prosesu investigasaun kriminál nia laran. Bankada CNRT konsidera katak tuir loloos Governu labele halo tán pagamentu ba objetu krime nian ne’ebé iha hela prosesu investigasaun kriminál nian.

Bankada CNRT konsidera laiha serteza ka garantia ba Timor-Leste katak hafoin Governu injeta tán osan hamutuk millaun $16,9 iha proposta OJE 2021, atu nune’e bele lori Ferry Haksolok mai iha Timor-Leste.

Maibé daudaun ne’e kompañia Atlantic Eagle Shipbuilding Lda bankarrota tiha ona, aleinde ne’e kondisaun Ferry Haksolok mós aat loos ona tanba para kleur iha tasi-laran no ferrujen hotu ona.

Bankada CNRT konsidera Autoridade RAEOA-ZEESM komete irregularidade ba indísiu krime nian ne’ebé fó prejuízu ba Estadu Timor-Leste, hanesan RAEOA-ZEESM deve hela ba kompañia Instituto de Soldadura e Qualidade (ISQ) osan besik rihun $600.

Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here