iklan

NASIONÁL, DESPORTU, DILI

Tasa 12 Novembru, Zebra prontu enfrenta AD. SLB

Tasa 12 Novembru, Zebra prontu enfrenta AD. SLB

Ekipa Zebra FC. Imajen/ Mídia LFA

DILI, 24 novembru 2020 (TATOLI) – Klube estimadu rai kulu-guisa, Baucau, Zebra FC prontu enfrenta AD. SLB Laulara iha jogu kontinuasaun tasa 12 Novembru ne’ebé sei hala’o iha Estádiu Munisipál Dili, kuarta loraik (25/11).

Notísia Relevante : Estrutura Zebra la sólidu

Asistente treinadór Zebra, Benjamin Gama hateten, atu bele garantia vitória ba Zebra kontra AD. SLB maka sira-nia parte halo preparasaun forte durante semana tolu nia-laran.

“Ami iha preparasaun ne’ebé di’ak tanba ami prepara iha Baucau durante semana tolu. Jogadór -sira sei mantein nafatin ho jogadór-sira ne’ebé foin lalais joga iha kopa Federasaun Futeból Timor-Leste, maibé ami hatama mós jogadór Zebra Junior nian balu hodi reforsa jogu kontra AD. SLB,” Benjamin hateten ba jornalista-sira, ohin, iha edifísiu Liga Futeból Timor-Leste, Bairro Formosa, Dili.

Nia promete, hakarak ka lakohi Zebra tenke halo mudansa iha jogu kontra AD. SLB tanba haree ba pasadu Zebra sempre derrota kontra ekipa hotu ne’ebé hamahan-an iha Liga Futeból Timor-Leste (LFTL).

“Ami tenke halo mudansa iha ami nia jogu. Hakarak ka lakohi ami tenke esforsu-an para bele manan iha jogu ida aban,” nia afirma.

Nia akresenta, Zebra deteta ona pontu fraku SLB nian. Tanba ne’e iha jogu nia-laran sira sei buka meiu atu hamate bola hosi parte fraku ne’ebé SLB iha nune’e bele lansa golu ba guarda rede SLB.

SLB otimista manan Zebra

Jogadór AD.SLB festeja sira-nia vitória iha kampu laran. Imajen/Mídia FFTL

Hosi sorin seluk, asistente treinadór AD. SLB Laulara, Efrém Jerónimo, otimista katak, sira-nia klube sei manan Zebra, maski jogadór avansadu prinsipál Mouzinho de Lima (10) sei la joga tanba aliza iha ain.

“Ami nia jogadór hotu di’ak. Maibé ami nia avansadu prinsipál Mouzinho mak sei la tun. Ami seidauk fó nia tun tanba nia ain ida aliza iha kopa FFTL to’o agora seidauk di’ak. Maski nune’e, ami otimista katak ami mak sei manan,” Efrem hateten.

Jornalista   : Hortencio Sanchez

Editór        : Francisco Simões

iklan
iklan

Leave a Reply

iklan
error: Content is protected !!