MAPKOMS no SEKOMS halo diálogu komunitáriu iha suku Ossu de Cima, tersa (24/11). Imajen TATOLI/Domingos Piedade Freitas

VIQUEQUE, 24 novembru 2020 (TATOLI)—Komunidade iha aldeia Liaro, suku Builale, postu administrativu Ossu, munisípiu Viqueque, disponibiliza fatin Uaitaka iha foho Mundo Perdido leten hodi harii torre transmisaun.

“Ha’u hanoin karik Ossu de Cima iha impedimentu ruma harii torre transmisaun, ami husi suku Builale prontu atu fo fatin Uaitaka no mós espasu hanesan dalan hodi bele implementa projetu VIII Governu tamba ninia benefisiu ba povu Ossu-oan sira,” Xefe suku Builale, António Gomes Moniz tenik ba Agência TATOLI, bainhira ramata diálogu komunitária, iha sede suku Ossu de Cima, tersa ne’e.

Nia haktuir, iha tempu portugués iha tinan 1940, malae mutin tidin hela destaka ida iha Uaitaka (Baki oan ida iha foho Mundo Perdido), ne’ebé babain bolu Cantada, tanba ne’e bainhira populasaun sira husi suku Ossu de Cima lakohi fornese fatin, husi suku Builale prontu ona atu fó espasu ba Governu atubele halo fali estudu foun harii torre ne’e.

Notísia Relevante: Komunidade Ossu de Cima la konkorda harii torre transmisaun iha Tunia

Tuir komunidade suku ne’e, oportunidade husi VIII Governu mai dala-ida de’it, tamba ne’e mak Governu hakarak halo buat ruma tanba ne’e presiza koopera hodi fó benefísiu ba populasaun sira hotu.

Hatan kona-ba kestaun ne’e, Ministru Asuntu Parlamentár no Komunikasaun Social, Francisco Jerónimo, apresia vontade komunidade atu entrega fatin hodi harii infraestrutura.

“Se bele entrega fatin seluk hodi implementa projetu ne’e, Governu sei kontinua kolabora atu bele harii torre ne’e,” nia dehan.

Parte Ministériu Asuntu Parlamentár no Komunikasaun Sosiál (MAPKOMS) hein desizaun autoridade lokál.

Ministru dehan, bainhira komunidade husi Suku Ossu de Cima lakohi fó espasu no laiha dalan seluk, maka tékniku sira husi MAPKOMS sei haree filafali fatin iha Uaitaka hodi buka solusaun ne’ebé di’ak liu atubele foti desizaun molok implementa projetu ne’e.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here