Koordenador Nasionál Civil Society Education Partnership, José de Jesus. Imajen TATOLI/Antónia Gusmão

DILI, 24 novembru 2020 (TATOLI)—Sosiedade Sivíl liuhosi Civil Society Education Partnership (CSEP), ne’ebé hanesan rede edukasaun estabelese iha tinan 2017 husi organizasaun lima, servisu iha área monitorizasaun, peskiza no advokasia ba polítika edukasaun iha Timor-Leste halo peskiza hodi identifika problema sosiál.

Koordenadór Nasionál CSEP, José de Jesus, hateten liuhosi perkiza ne’e identifka maioria fasilidade eskola sira kuaze 60% to’o 92% mak kondisaun ladi’ak no la sufisiente ba professór no estudante sira atu hala’o prosesu aprendizajen, hanesan sala aula la sufisiente, nune’e akumula estudante husi 45 to’o 70 kada sala aula.

“Bazeia ba deskobrementu durante monitorizasaun, CSEP hakarak rekomenda no ejize Governu, liuliu Ministériu Edukasaun, Juventude no Desportu (MEJD) no Ministériu Ensinu Superiór no Kultura (MESK), hasa’e orsamentu alokadu ba setór edukasaun ba 15% to’o 20% ba kada tinan, hodi responde ba difikuldade hirak ne’e,” Koordenadór Nasionál CSEP, José de Jesus, hateten liuhosi aprezentasaun rezultadu monitorizasaun, iha salaun enkontru Fórum Organizasaun Naun Governamentál (FONGTIL), Caicoli, tersa ne’e.

Iha sorin seluk, sosiedade sivíl ne’e nota katak kuaze eskola hotu sei iha nafatin profesór ho idade tama ona terseira idade ou idade reforma, maibé sei hanorin nafatin no balun hanorin iha eskola kaer aula rua iha tempu hanesan.

“Ida-ne’e ami konsidera presaun fíziku no mentál ba profesór sira-nia saúde,” nia akresenta.

Tanba ne’e, CSEP rekomeda Governu oferese bolsu estudu barak liután ba kbiit laek nia oan sira, nune’e nível hotu bele asesu ba eskola, la’ós de’it iha nível universidade maibé iha mós nível ensinu báziku iha rai-laran.

Timor-Leste seidauk iha polítika dezenvolvimentu sedu ba labarik kiik ka Early Childhood Developmente Policy hodi asegura edukasaun no saúde di’ak ba labarik kiik husi nível rurál to’o nasionál.

Sosiedade sivíl ne’e hala’o mós vizita ba Eskola Tékniku Vokasionál iha Dili no iha área rurál sira, liuliu sira ne’ebé foin konverte husi eskola sekundáriu jerál iha tinan 2015 no 2016 nia laran, maioria implementa ladún di’ak no barak maka ho fasilidade naton atu fasilita prosesu aprendizajen tuir departementu idaidak hanesan agrikultura, turizmu, arte, téknika, siénsia, laboratóriu prátika.

Nune’e mós, CSEP husu ba MEJD investe iha área infraestrutura no rekursu umanu, liuliu profesór sira tuir méritu, kadeira, meza, laboratóriu, biblioteka, bee no saneamentu, atu asegura kualidade eskola ne’ebé di’ak ba timor-oan, tantu kbiit laek, defisíensia no povu baibain nia oan.

Observa mós katak komprimisu Governu baalokasaun Orsamentu Jerál Estadu (OJE) 2021 ho 10% husi totál orsamentu.

“Signifika seidauk iha seriedade ba asuntu dezenvolvimentu edukasaun iha nasaun ida ne’e. Tanba ne’e maka CSEP rekomenda ba membru Governu sira atu redúz despeza ne’ebé aloka barak liu ba perdiem, sosa karreta, kombustível, no viajen lokál. Ami sujere iha komprimisu di’ak ba dezenvolvimentu setór edukasaun liuliu eskola públika sira,” nia subliña.

CSEP konsidera MEJD fraku iha monitorizasaun tanba bele halo monitorizasaun ba ezekusaun fundu konsensaun eskola ba Eskola Bázika Filiál (EBF) sira iha Timor-Leste, eskola iha nível aldeia, no suku ninia kondisaun laiha mudansa tanba fundu konsensaun eskola kada eskola simu husi Governu ho montante $1 kada alunu no kada fulan maioria direjente eskola la hatene tuir tanba diretór eskola ho koordenadór EBF uza hanesan privadu.

Aleinde ne’e, kondisaun aula inklui dezeñu eskola la fasilita ema ho difisiente sira atu asesu, laiha laboratóriu prátika, laiha biblioteka, laiha bee-moos no saneamentu, laiha kadeira no meza, no pior liu profesór ida hanorin aula rua dala ida iha oras hanesan.

Identifika mós iha nível suku no aldeia sira área rurál, laiha eskola pre-eskolár mak eziste no balun eziste iha nível munisípiu maibé profesor sira abandonadu la hetan saláriu inklui estudante sira laiha fasilidade.

Joven ne’ebé la ramata eskola hela iha área rurál, labele asesu ba programa ensinu rekorrente tanba laiha fasilidade no manorin atu fasilita.

Universidade Nasionál Timór Lorosa’e (UNTL) kada tinan simu rejistrasaun husi estudante graduadu eskola sekundária, maibé simu de’it menus $5.000 no restu hili dalan dezempregu tanba universidade privada sira selu karun liu.

Nune’e, laiha tán opsaun seluk atu kontinua eskola maski eskola ne’e hanesan direitu fundamentál ida iha Repúblika Demokrátika Timor-Leste (RDTL).

Profesór sira kuaze 4.000-resin mak sei asume kontratadu no laiha serteza bainhira mak iha mudansa ba sira-nia estatutu.

Realidade, demanda iha terrenu kontinua sai prokupasaun públiku atu eziji númeru profesór sira barak liután hodi jere aula tuir rásiu entre estudanter no profesór sira.

Munisípiu sira ne’ebé mak CSEP halo monitorizasaun mak hanesan Ermera, Bobonaro, Ainaro, Aileu, Baucau no Dili.

Liuhosi monitorizasaun ne’e mak sosiedade sivíl hamosu rekomendasaun no submete ona ba Parlamentu Nasionál (PN), eskola ne’ebé mak hetan monitorizasaun mak husi nível Eskola Ensinu Báziku, Ensinu Primáriu, pre-sekundáriu no sekundáriu no monitorizasaun ne’e realiza durante fulan neen.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here