Eis Prezidente Repúblika, José Ramos Horta. Imajen Tatoli/Jogerjo Guterres.

DILI, 24 novembru 2020 (TATOLI)—Eis Prezidente Repúblika no Laureadu Prémiu Nobel da Paz, José Manuel Ramos Horta, hateten nasaun ida atu hakmatek presiza juventude hotu nia kontribuisaun tanba futuru pertense ba joven sira-nia liman.

“Ha’u husu ba imi joven sira buka estuda no estuda tanba imi mak futuru pertense nasaun ida-ne’e nian. Tanba ne’e imi-nia papél no responsabilidade mak kria dame iha nasaun ida-ne’e, tanba nasaun ida atu hakmatek presiza imi hotu nia kontribuisaun,” Laureadu Prémiu Nobel da Paz, José Ramos Horta, hateten ba juventude sira bainhira sai oradór ba Semináriu Nasionál ho tema “Responsabilidade Sidadun hodi Harii Pás no Valoriza Direitu Umanu” ne’ebé realiza hosi Fundasaun Alola iha Salaun Konferénsia CNC, Antigu Komarka, Balide, Dili, tersa ne’e.

Maibé, nia dehan, ko’alia kona-ba dame joven tenke harii dame hahú hosi uma-laran tanba laiha dame hahú iha uma-laran, nasaun ida laiha no mós laiha dame.

“Ha’u husu ba joven sira, imi tenke hametin dame hahú hosi uma-laran,” Ramos Horta hateten.

Eis Prezidente Repúblika ne’e hateten, joven sira bainhira atu harii pás iha nasaun ida presiza ema matenek. Tanba ne’e, nia dehan, juventude sira hakarak atu  kontinua eskola iha universidade ruma karik buka eskola ida-ne’ebé mak kualidade, atu nune’e bele fó matenek ba imi, nune’e futuru imi bele harii nasaun ida ne’e ho di’ak.  

“Ha’u husu ba imi buka eskola ida-ne’ebé mak kualidade no garante katak hosi eskola ne’e bele fó matenek ba imi. No, imi tenke obriga-aan estuda didi’ak atu nune’e futuru imi bela harii nasaun ida-ne’e ho di’ak. Maibé, imi labele buka mak eskola ne’ebé mak laiha kualidade ikus mai lahatene buat ida no sosa de’it diploma,” nia dehan.

Laureadu Pémiu Nobel da Paz ne’e mós apela ba joven sira katak  bainhira  sai matenek ona tenke hadomi inan-aman nia sakrifísiu.

“Ha’u husu ba imi Joventude presiza hadomi inan-aman nia sakrifísiu tanba liuhosi sira mak oan bele sai matenek,” nia dehan.

Jornalista: Osória Marques

Editór: Cancio Ximenes

1 KOMENTÁRIU

  1. Susar uitoan ba joven sira sira agora ne’e tanba maioria joventuda de’it. Barak fo liu importansia ba treinu arte marsial duke estuda, no asuntu ne’ebe sira ko’alia loroloron, barak liu maka kona-ba baku malu, ida-ne’e ita-nia maun-alin, ida-ne’eba fali ita-nia funubalun. Joven barak sai estremista arte marsial, tanba ne’e susar atu harii dame.

HAKEREK NO HATÁN

Please enter your comment!
Please enter your name here