Mapa Bobonaro

BAUCAU, 24 novembru 2020 (TATOLI)—Ministru Planu no Ordenamentu, atuál Vise Primeiru-Ministru, José Maria dos Reis, hateten iha tinan 2021 nia parte sei halo levantamentu dadus kona-ba kresimentu populasaun iha Munisípiu Baucau, Viqueque, Lautem, Ermera no Bobonaro.

“Ami iha ona planu atu halo levantamentu iha Munisípiu lima inklui halo konsulta nafatin ho entidade no komponente hotu atu fó nafatin informasaun hodi nune’e ita bele realiza planu tolu ne’e ho di’ak (Ordenamentu territóriu, ordenamentu munisipál no urbana),” Nia hato’o asuntu ne’e durante serimonia abertura ba diskusaun tékniku kona-ba lei ordenamentu territóriu ne’ebé hala’o iha Munisípiu Baucau, tersa ne’e.

Notísia Relevante :Governu prioritiza planu ordenamentu territóriu

Levantamentu dadus ne’e importante hodi nune’e bele hatene loloos númeru kresimentu populasaun iha munisípiu lima ne’e tanba kada tinan sempre aumenta maka’as.

Tuir nia dadus hirak ne’e sei tulun Governu atu oinsá implementa planu ordenamentu territóriu, planu ordenamentu munisipál, inklui planu urbana.

“Ita haree agora iha sidade Dili atu halo de’it uma mós fatin laiha tanba ita atraza tiha ona planu ordenamentu iha Dili, antes ne’e, ita iha tiha ona estudu kona-ba planu urbana iha Dili no Baucau maibé, tanba troka Governu planu sira ne’e labele realiza,” tenik tan.

Notísia Relevante :2021, MPO prioritiza planu nasionál ordenamentu territoriál

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here