Imajen/Media MAE.

DILI, 24 novembru 2020 (TATOLI)—Governu liuhosi Ministériu Administrasaun Estatál (MAE) apresia ho inisisativa hosi familía Jape nian ne’ebé mak halo doasaun ba konstrusaun edifísiu Administrasaun Postu Administrativu Maubara.

“Kontente tebes tanba ohin ami asina doasaun ida, ne’ebé mak oferese hosi Dili Development Center Timor Plaza ba Governu Timor-Leste liuhosi MAE hodi konstrui edifísiu Administrasaun Posu Administrativu Maubara, hodi ajuda administradór hala’o nia servisu ho di’ak liután,” Ministru Miguel Pereira de Carvalho ba jornalista sira salaun VIP MAE, Colmera, Dili, tersa ne’e.

Governante ne’e haktuir, Postu Administrativu Maubara iha relasaun pasadu ho família Jape tanba ne’e mak sira hakarak dezenvolve sira-nia moris fatin no planu ba futuru atu dezenvolve ekonómia lokál iha Maubara.

Entretantu, Diretór Ezekutivu Dili Development Campanha, Tony Jape, hateten konstrusaun ne’e nia durasaun tinan ida, sei hahú iha dezembru tinan ne’e no sei finaliza dezembru tinan oin.

“Ami sei hahú konstrusaun iha dezembru tinan ne’e no sei akaba iha 2021. Medida konstrusaun edifísiu ba Postu Administrativu Maubara nian ho 26X15,” Diretór Ezekutivu ne’e hateten.

“Ami halo konstrusaun ba Postu Administrativu Maubara nian tanba ami maun-alin no bin-alin hotu moris iha Maubara, ida-ne’e hanesan kontribuisaun ida ba dezenvolvimentu iha Maubara nian,” nia dehan.

Osan ba konstrusaun edifísiu Postu Administrativu Maubara, nia hatuir, maihosi família Jape ne’ebé mak hamutuk $195,000 no hetan suporta hosi Governu Timor-Leste mak ohin asina memorandu ho MAE hodi bele realiza.

Aleinde ida-ne’e, nia dehan, hanoin halo konstrusaun iha fatin seluk no kontribui ba dezenvolve iha Timor-Leste maibé kompañia Jape sei foka liu ba edifísiu Maubara depois finaliza mak planu tan ba fatin seluk.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here