Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Egas Cristovão.

BAUCAU, 24 novembro 2020 (TATOLI)—Vise Primeiru-Ministru, no Ministru Planu no Ordenamentu, José Maria dos Reis, apela ba funsionáriu públiku sira atu labele prátika polítika partidu nian iha servisu fatin.

José Maria dos Reis hato’o apela ne’e ba Autoridade Munisípiu Baucau, Lautem no Viqueque, perante serimonia abertura kona-ba diskusaun lei ordenamentu territóriu ne’ebé hala’o iha salaun Sentru Konvensaun Baucau, tersa ne’e.

Notísia Relevante:“Orgaun ezekutiva hala’o knaar tuir autonomia polítika”

“Ha’u hakarak hateten ba ita hotu katak adminstrasaun públiku mak nu’udar memoria institusionál, la hanesan ho Governu ka Ministru ida ne’ebé ka’er ukun, ohin ka aban bele tun ka troka no seluk sa’e fali, maibé ida ne’ebé permanente mak sira ne’ebé iha administrasun públiku”, nia hateten.

Governante ne’e konsidera funsionáriu públiku, komesa husi kargu xefia sira funsionáriu baibain nu’udar memoria institusionál ne’ebé sei garante funsionamentu servisu iha administrasaun públika.

“Ha’u apela liuba funsionáriu sira ne’ebé mak dezempeña kna’ar profesionál ida ne’e atu hametin liután Instituisaun Estadu ida ne’e. polítiku husik ba ema polítiku sira mak halo. Iha Administrasaun Públika labele iha polítiku ho nune’e mak ita sei hametin no garante liután instituisaun Estadu ne’e la’o ba oin ho di’ak liután”, nia dehan.

Nia hateten funsionáriu mós sai save ba dezenvolvimentu instituisaun estadu nian tanba ne’e presiza fó apoiu mós ba kargu polítiku sira hanesan Minsitru, Sekretáriu Estadu no seluk tan atu implementa no ezekuta programa sira.

“Ida ne’e mak la konsege halo entaun susar tebtebes ba Estadu ida ne’e, Governu foun bele mai ho ninia ministru mesak diak de’it, maibe administrasaun públika la funsiona ho di’ak sei la halo buat ida”, katak nia.

Notísia Relevante:Funsionáriu Públiku Tenke Iha Espíritu Dezenvolve Administrasaun Públika

Jornalista: Tomé Amado  

Editór: Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here