CVTL, hamutuk ho Parseiru dezenvolvimentu no Autoridade Lokal Munisipiu Liquica inagura projetu bee moos iha Suku Gariana.Imajen/Felicidade Ximenes.

MAUBARA, 24 novembru 2020 (TATOLI)—Krúz Vermella Timor-Leste (CVTL-sigla portugés) no KOICA no Autoridade Munisípiu Liquiçá, iha tersa ne’e, inaugura ona projetu kanalizasaun bee-moos no toilet komunidade hamutuk 125 iha Aldeia Gariana, Suku Vatuvou, Postu Administrativu Maubara,  Liquiçá.

CVTL hamutuk ho Autoridade Munisipiu Liquica inagura toilet komunidade.Imajen/Felicidade Ximenes.

”Kruz vermelha halo ona projetu atus ida resin buka fundu husi li’ur no agora daudaun sei iha projetu atus ba atus mak Krúz Vermella sei ajuda. Ida-ne’e mak prinsípiu CVTL nian. Tanba ne’e mak ami tau ona bee-moos iha aldeia ida-ne’e,” Prezidente CVTL, Madalena Hanjam, dehan durante serimónia inaugurasaun projetu rua ne’e, ohin.

CVTL ezekuta projetu ne’e tanba hetan apoiu finansiamentu husi KOICA no seluk tan, maibé komunidade rasik mak servisu.

Projetu kanalizasaun bee-moos ne’e konstrui ona tanki hamutuk 14, torneira 26  ho distánsia hamutuk metru 13.396 hodi oferese bee-moos ba komunidade uma-kain 147 ho totál populasaun 677.

”Projetu ne’ebé mak ami halo ne’e durasaun to’o tinan rua (marsu 2019-novembru 2020) ba iha komunidade Gariana ne’e rasik no komunidade sira seluk nia proposta sei mai nafatin ba ami entaun husi ne’e ami tetu didiak iha tempu badak nia laran bee sei ba hotu-hotu liuliu prioridade ba komunidade iha área rurál. Ida-ne’e tama ona iha Krúz Vermella  nian planu estratéjiku,” nia tenik tan.

Eis Vise Ministra Saúde ne’e relata projetu ne’e gasta orsamentu hamutuk $55.000. Husi montante ne’e Komunidade Suku Gariana kontribui rihun $15,  no $40.000 husi CVTL ne’ebé mak hetan apoiu husi doadór sira.

“Koidadu bee-moos ne’e ho di’ak no tenke iha responsabilidade másimu uza bee,” nia tenik.

Entretantu, serimónia inaugurasaun projetu bee-moos no toilet komunidade ne’e hetan partisipasaun husi Autoridade Munisípiu Liquiçá, Autoridade Lokál no seluk tan.

Jornalista : Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here