Adão Monteiro. Imajen TATOLI/Domingos Piedade Freitas.

VIQUEQUE, 24 novembru 2020 (TATOLI)–Komunidade Ossú de Cima, Postu Administrativu Ossú, Munisípiu Viqueque, Adão Monteiro, prefere liu Governu fahe osan $25 ba xefe família ida-idak duké fahe produtu lokal hanesan fehuk-koto-tomate ho sasán nesesidade bázika sira seluk.

Notísia Relevante: PM Taur:  “programa Cesta Bázika’ todan, presiza ema hotu apoiu”

“Ami iha Ossú de Cima fehuk barak. Tomate no koto mós barak tebes. Ne’ebé, di’ak liu Governu fó de’it ona osan $25 ba ami kada família hodi sosa fali ayam potong ka na’an ruma hodi bele han, tanba ida-ne’e mak ami la iha,” Adão Monteiro haktuir liuhosi diálogu komunitária ho Ministériu Asuntus Parlamentares no Komunikasaun Sosiál (MAPCOMS) ho komunidade Ossú kona-ba “Importánsia Harii Torre Transmisaun hodi Tulun Komunidade Viqueque hodi Asesu Informasaun kona-ba Prosesu Dezenvolvimentu Sira liuhosi Plataforma Dijitál Nian”, iha Sede Suku Ossu de Cima, Ossú, tersa ne’e.

Tanba ne’e, nia husu ba Governu atu labele distribui fila-fali produtu hanesan fehuk, tomate no koto hodi fahe fila-fali iha Ossú de Cima tanba produtu hirak ne’e iha fatin refere barak tebes.

Hatán ba kestaun ne’e, Ministru Assuntus Parlamentares no Komunikasaun Sosiál, Francisco Gerónimo, hatete programa Cesta Bázika nu’udar programa ida atu tau osan fatin ida atu emprezáriu sira bele mai sosa.

“Se komunidade Ossú iha produtu di’akliu halibur produtu ida, iha fatin ida, atu emprezáriu sira bele mai sosa. Ita-boot sira labele tau keta-ketak. Se ita-boot sira iha karón rua ka tolu hanesan ne’e, tau hamutuk ho sira seluk hodi sai tonelada ida, nunee bele faan fila-fali ba emprezáriu. Ho ida-ne’e mak bele hetan fali osan ruma hosi ita-boot sira-nia produtu lokál sira ne’e,” nia dehan.

Imajen/Media MAPCOMS,

Nia hatutan, bainhira emprezáriu sira sosa tiha tau fila fali iha bote hamutuk ho ai-han sira seluk no distribui fila-fali ba populasaun sira. Se balun ne’ebé mak lakohi sasán hirak ne’e, bele faan fila-fali ba ema seluk ne’ebé mak hakarak hodi hetan fali osan hodi sosa buat seluk ne’ebé mak laiha hanesan na’an no ayam potong,” nia dehan.

Nia haktuir, Governu sei la fó osan diretamente osan $25 maibé Governu sei sosa produtu lokál hodi rekupera ekonómia rai-laran tanba impaktu hosi pandemia COVID-19 ne’ebé halo Timr-Leste nia ekonómia monu.

“Ha’u hanoin relasiona ho COVID-19, ita-nia ekonómia monu duni. Maibé sa’e fila-fali ona tanba Governu halo antisipasaun mak hanesan fó subsídiu $200 no progarama Cesta Bázika hodi ajuda tebes ekonómia iha rai laran,” nia dehan.

Notísia Relevante: SEKoop kontrata kompañia 12 sosa produtu ba programa Cesta Bázika

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here