Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 24 novembru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, destitui Sekretária Jerál Parlamentu Nasionál, Cedelízia Faria dos Santos tanba ‘viola’ Lei Organizasaun no Funsionamentu Administrasaun Parlamentár (LOFAP) no Rejimentu Parlamentu Nasionál (RPN).

Notísia Relevante: Sekretária Jerál PN sei lori kazu ezonerasaun ba tribunál

Prezidente Parlamentu Nasionál, Aniceto Guterres Lopes, iha loron 24 novembru 2020 liuhosi despaxu númeru 30/2020/PPN, halo destituisaun ba Sekretária Jerál Parlamentu Nasionál, Cedelízia Faria dos Santos.

“Prezidente Parlamentu Nasionál halo destituisaun bazea ba númeru 3 artigu 23, Lei númeru 12/2017, 24 maiu, ne’ebé hateten katak Sekretária Jerál bele desituidu tanba justa kauza. Defaktu iha duni justa kauza mak justifika Prezidente foti desizaun ida-ne’e, iha ámbitu violasaun ba Lei Oranizasaun no Funsionamentu Administrasaun Parlamentár no viola Rejimentu Parlamentu Nasionál artiu 85,” Prezidente Parlamentu Nasionál, Aniceto Guterres, informa liuosi komunikadu, ne’ebé Ajénsia TATOLI asesu, tersa ne’e.

Faktu seluk mak hanesan tuir mai ne’e:

Dahuluk, Sekretária-Jerál hatudu abuzu ba nia funsaun sira ka halo intervensaun ba kompeténsia Gabinete Seguransa nian ne’ebé tutela direta ba Prezidente Parlamentu Nasionál.

Daruak, Sekretária Jeral la dezenpeña nia funsaun koordenasaun servisu regulár ho Prezidente Parlamentu Nasionál ne’ebé mós nu’udar Prezidente ba Konsellu Administrasaun.

Datoluk, Sekretária-Jerál Parlamentu Nasionál liuohosi nia despaixu iha loron 15 maiu 2020 fó instrusaun ba funsionáriu Parlamentu Nasionál, hodi boikota funsionamentu nomál plenária, Iiuliu orienta hodi halo paralizasaun ba sistema sonoro no apoiu seluk ba plenária iha loron 18 no 19 Maiu 2020.

Dahaat, Sekretária-Jerál Parlamentu Nasionál, la obedese ba orientasaun superiór, demonstra laiha responsablidade durante enérjia elétrika avaria, inklui mákina fotokopiadora, ar kondisionadu no abastesimentu ba bee iha Parlamentu Nasionál.

Hafoin halo destituisaun ba Sekretária-Jerál Parlamentu Nasionál, Cedelízia Faria dos Santos, Prezidente Parlamentu Nasionál Aniceto Longuinhos Guterres Lopes, halo kedas despaixu númeru 31/2020/V/PPN hodi nomeia Adelino Afonso de Jesus, Tékniku Superiór Parlamentár Asistente, eskalaun 3 hosi kuadru permanente funsionáriu Sekretariadu Jerál Parlamentu Nasionál no iha tempu badak sei entrega kargu hosi Sekretária-Jeral sesante ba Sekretáriu Jerál foun.

Jornalista: Evaristo Soares Martins

Editór: Cancio Ximenes

1 KOMENTÁRIU

  1. Uluk Sra. Cedeliza asume kargu refere liu husi dalan rekrutamento,(hatama dokumentos oi-oin no liu husi tes) maibe agora nomea deit ona liu husi dalan politik, la hatene ida ne’ebe mak los liu, tuir rezimentu PN nian, atu asume kargu refere liu husi dalan rekrutamentu mak los ou liu husi dalan nomesaun deit mak los?????

HAKEREK NO HATÁN

Please enter your comment!
Please enter your name here