Imajen/Media SEII.

DILI, 23 novembru 2020 (TATOLI)–Sekretária Estadu Igualdade Inkluzaun (SEII), Maria José da Fonseca Monteiro de Jesus, hateten violénsia kontra feto no labarik-feto sira sei nafatin sai problema boot ida iha Timor-Leste, maske instituisaun Governu hamutuk ho parseiru sira halo ona esforsu kolaborativu ne’ebé di’ak.

Notísia Relevante: SEII asina akordu ho KOICA atu kombate violénsia hasoru feto

Maria José da Fonseca Monteiro de Jesus hatutan, suporta hosi Governu Korea sei sai hanesan suporta boot ida atu komplementa Governu nia esforsu sira ba luta hasoru  Violénsia Bazea ba Jéneru.

“Ho suporta adisionál hosi Governu Korea sei sai hanesan suporta boot ida atu komplementa Governu nia-esforsu sira ba luta hasoru Violénsia Bazea ba Jéneru (VBJ). Ami nafatin halo advokásia ho liña ministériu hotu, bainhira halo advokásia ba jéneru no ba liña ministériu hotu atu asegura orsamentu estadu ne’ebé sensivél ba jéneru,” Maria José da Fonseca Monteiro de Jesus hateten iha abertura ba sorumutu grupu koordenasaun jéneru ba dahaat (4) ho parseiru nasionál no internasionál sira iha Otél Timor, segunda ne’e. . 

Nia dehan projetu ne’e, sei uza maneira ne’ebé efetivu atu prevene VBJ molok akontese. Ida-ne’e sei to’o individu sira (inklui joven no grupu sira ne’ebé hasoru diskriminasaun bebeik) no suporta família ho komunidade sira atu hetan koñesimentu no abilidade atu sai ajente ba mudansa no hamriik hasoru asédiu seksuál no forma seluk ba VBJ.

Projetu ne’e, nia dehan, sei suporta instituisaun sira atu habelar sira-nia servisu no hadi’ak kualidade ba atendimentu esensiál sira, bele to’o liután ba sobrevivente ba violénsia sira atu enkoraja ema seluk (sobrevivente) hodi buka suporta.

Ida-ne’e, tuir nia, sei kontribui atu hadi’ak liután monitorizasaun no akuntabilidade atu interpreta komitmentu sira  iha papél ba asaun prátika, servisu ho sosiedade sivíl no Governu, no envolve mídia no públiku jerál.

Entretantu, Reprezentante UN Women iha Timor-Leste, Sunita Caminha, hateten Governu hamutuk ho ONU, ajénsia haat inklui ho KOICA atu haforsa koletiva no kontinua parseria ba asuntu VBJ.

“Hamutuk ba Igualdade sei halibur espesialista no papél hosi Instituisaun Governu Timor-Leste sira, ajénsia haat ONU nian (UN Women, UNDP, UNFPA no IOM) no KOICA. Ida-ne’e harii tanba ita-nia forsa koletivu hanesan parseiru atu responde ba asuntu sira ne’ebé konetadu ba violénsia iha uma-laran, asédiu seksuál no violénsia iha fatin públiku no mós ho VBJ iha kontestu dezastre nian,” Reprezentante UN Women ne’ebé reprezentante  ajénsia haat ONU nian ne’e afirma tan.

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here