DILI, 23 novembru 2020 (TATOLI) – Sistema servisu operadór Telekomunikasaun Telemor (call center), hahú ohin, tuku 15:00 Otl, paradu uitoan, hafoin parte Servisu Investigasaun Kriminál (SIC) ezekuta mandadu buska no detensaun ba jestór prinsipál ida iha Telemor ho inisiál TVB iha edifísiu Telemor, CBD-4, Timor Plaza, Dili.
Notísia Relevante : SIC detein jestór prinsipál Telemor ho Elite Computer
Tuir observasaun jornalista Agência Tatoli nian iha call center Telemor nian nota, bainhira SIC ezekuta mandadu Tribunál Distritál Dili (TDD) hodi halo detensaun ba suspeitu TVB iha nia servisu fatin, polísia aviza ona ba funsionáriu Telemor hotu, hahú hosi servisu sekretaria no administrasaun, too ekipa sistema call center to’o ekipa data center Telemor iha CBD-2, Timor Plaza, tenke hamamuk sira-nia servisu fatin hodi ekipa SIC no ekipa IT halo investigasaun sistema servisu internet Telemor nian.
Situasaun ne’e halo funsionáriu Telemor tomak kuaze na’in-20-resin sente trauma no hafodak, bainhira polísia halo pasa revista no halo apreensaun ba dokumentu importante balun ne’ebé suspeitu TVB utiliza.
Funsionáriu sira ne’ebé halo atendimentu ba sistema call center kuaze oras resin la halo servisu. Nune’e mós ekipa-sira ne’ebé servisu iha sistema data center nian, SIC blokeia totál sira-nia atividade hodi fó tempu ekipa rekolla evidénsia.
Durante SIC halo detensaun ba suspeitu TVB mós koopera di’ak hodi fó sai dadus balun ne’ebé SIC rekolla relasiona ho servisu ne’ebé suspeitu ne’e halo durante ne’e.
Tatoli mós observa katak traballadór Telemor balun hosi Tailándia relata kedas situasaun ne’ebé jestór prinsipál Telemor nian ho inisiál TVB hasoru ba Chief Executive Officer (CEO) Kompañia Telemor Internasionál iha Vietnam.
Jornalista : Eugénio Pereira
Editór : Francisco Simões
Thaliandia ka Vietnam, CEO Telemor nian nee?